Փաստ ինֆո

Հայ Առաքելական եկեղեցու Արարատյան հայրապետական թեմի առաջնորդական փոխանորդ Նավասարդ Արքեպիսկոպոս Կճոյանն իրեն առաջադրված մեդադրանքը չի ընդունում, համարում է անհիմն և ստահոդ: Այս մասին «Փաստինֆո»-ի հետ զրույցում ասաց Նավասարդ Արքեպիսկոպոս Կճոյանի պաշտպան Հովիկ Արսենյանը:

«Ինձ համար միանշանակ անհասկանալի է և անտրամաբանական, թե քրեական հետապնդում իրականացնելով Սրբազանի նկատմամբ, ինչ նպատակ է հետապնդվում: Իրավական հարթությունից դուրս է, ասել է թե, ոչ մի փաստական տվյալ, ապացույց չկա, որ հիմքում դրվեր մեղադրանքի»,-ասաց նա:

Փաստաբանը տեղեկացրեց, որ Արքեպիսկոպոս Կճոյանը նախկինում՝ 2010թ.-ին հարցաքննվել է՝ վկայի կարգավիճակով:

«Շատ անհասկանալի և անտրամաբանական էր, երբ մտել ենք քննիչի աշխատասենյակ և իրեն անմիջապես մեղադրանք են առաջադրել: Հրավիրել են ԱԱԾ քննչական դեպարտամենտ, բնականաբար մենք չգիտենք, թե ինչ կարգավիճակում է, ավելի շատ տրամաբանված է, որ պետք է որպես վկա հարցաքննեն, բայց այդպես չեղավ: Միանգամից մեղադրանք առաջադրեցին: Առավել ևս ես ծանոթ էի տարիներ առաջ որպես վկա կատարված հարցաքննության արձանագրությանը, որը խիստ մակերեսային, երկու թերթով ցուցմունք էր՝ ոչինչ չասող»,- ասաց պաշտպանը:

Հարցին, թե արդյո՞ք Նավասարդ Արքեպիսկոպոս Կճոյանի դեմ ցուցմունք տված անձ կա, փաստաբանն ասաց, որ չի կարող ասել, որովհետև պաշտպանական կողմը չի տիրապետում քրեական գործի նյութերին և տիրապետելու դեպքում էլ այդ հարցերին չէր պատասխանի:

Հարցին, թե արդյո՞ք մեղադրանքի հիմքում ընկած է նախկինում նշանակված դատաձեռագրաբանական փորձաքննությունը, փաստաբանը պատասխանեց. «Իրավական հարթությունում չեմ տեսնեմ: Մեծ հարգանք եմ տածում ԱԱԾ-ի քննչական դեպարտամենտի գործունեության վերաբերյալ ՝ անկախ, թե որ իշխանության օրոք է եղել:Ինձ համար շատ տարօրինակ էր, որ նման պրոֆեսիոնալ մարդիկ, ովքեր աշխատում են այդտեղ, առանց բավարար ապացույցներ ունենալու մեղադրանք են առաջադրել իմ պաշտպանյալին: Հետևաբար՝ այլ տեղ պետք է փնտրել հիմքը, հիմնավորումը»:

Հարցին, թե արդյո՞ք այլ տեղ ասելով փաստաբանը նկատի ունի քաղաքականությունը, Արսենյանը պատասխանեց, որ դրա վերաբերյալ ոչինչ չի ասել և տեղյակ չէ:

«Ես ասում եմ՝ իրավագիտության հետ կապ չունեցող, անհիմն, շինծու մեղադրանք է: Թե այս պահին ինչ իրավիճակից ելնելով է, որ մեղադրանք են առաջադրել Սրբազանին, դա արդեն խորհելու տեղիք է տալիս: Ես չեմ կարող ասել, թե որտեղից է գալիս և ինչու»,- ասաց Արսենյանը: Դիտարկմանը, որ Արքեպիսկոպոսին մեղադրանք առաջադրելու մասին հայտնի է դարձել Ամենայն Հայոց Կաթողիկոս Գարեգին Բ-ի հայտարարությունից մեկ օր անց և արդյո՞ք փաստաբանը դա պատահական է համարում, Արսենյանը պատասխանեց, որ նա իրականացնում է Սրբազանի պաշտպանությունը և այդ շրջանակներից դուրս չի գալիս:

Հիշեցնենք, որ արքեպիսկոպոս Կճոյանի անունը դեռևս տարիներ առաջ էր շոշափվում օֆշորային սկանդալի մեջ՝ կապված գործարար Փայլակ Հայրապետյանի ունեզրկման հետ: Արքեպիսկոպոս Կճոյանից բացի օֆշորային սկանդալի կենտրոնում էր հայտնվել նաև այն ժամանակվա վարչապետ Տիգրան Սարգսյանը, սակայն հարուցված քրեական գործի շրջանակներում ո՛չ Նավասարդ արքեպիսկոպոս Կճոյանը, ո՛չ Տիգրան Սարգսյանը չեն ներգրավվել որևէ դատավարական կարգավիճակով: Գործով մեղադրանք էր առաջադրվել Նավասարդ արքեպիսկոպոս Կճոյանի սանիկ Աշոտ Սուքիասյանին՝ խարդախությամբ ուրիշի առանձնապես խոշոր չափերով գույքի նկատմամբ իրավունք ձեռք բերելու, հանցավոր ճանապարհով ստացված խոշոր չափերով եկամուտներն օրինականացնելու, չարամտորեն խոշոր չափերով հարկեր, տուրքեր և պարտադիր այլ վճարումներ կատարելուց խուսափելու համար: 2017թ-ին Երևանի ընդհանուր իրավասության դատարանը՝ դատավոր Վարդան Գրիգորյանի նախագահությամբ, մեղավոր էր ճանաչել Սուքիասյանին՝ դատապարտելով ազատազրկման՝ 16 տարի ժամկետով: Դատարանը վճռել էր մոտ 8 մլրդ 919 մլն դրամ բռնագանձել՝ հօգուտ Փայլակ Հայրապետյանի և 632 մլն 403 հազար դրամ՝ հօգուտ Հայրապետյանի որդու: Դատավճռից երկու տարի անց Վերաքննիչ քրեական դատարանը մեղմացրել է Սուքիասյանի մեղադրանքը և անմեղ ճանաչել՝ փողերի լվացման և առանձնապես խոշոր չափերի խարդախություն կատարելու մասով: Տուժող կողմը վչռաբեկ բողոք է ներկայացրել՝ պահանջելով բեկանել Վերաքննիչ քրեական դատարանի որոշումը: Ըստ մեղադրանքի՝ 2010 թվականի ամռանն իր հետ քավոր-սանիկական հարաբերությունների մեջ գտնվող անձի հետ նախնական համաձայնությամբ, խարդախությամբ՝ իբրև

Աֆրիկայի մայրցամաքում իրեն պատկանող ադամանդի հանքավայրերում 12.000.000 ԱՄՆ դոլար գումարի չափով ներդրում կատարելու դեպքում արտադրողականությունը բարձրացնելու, արդյունահանված ադամանդի հումքը Հայաստանի Հանրապետությունում վերամշակելու և վաճառքի հանելու մտացածին պատրվակով, շահագրգռել է ՀՀ ձեռնարկատերերից մեկին հիշյալ ներդրումը կատարելու հարցում, այնուհետև ձեռք են բերել վերջինիս ու նրա մերձավորներին պատկանող առանձնապես խոշոր չափերի՝ 11.442.068.000 ՀՀ դրամ ընդհանուր արժողությամբ, մի շարք անշարժ գույքերի նկատմամբ իրավունք, դրանց գրավադրմամբ ՀՀ առևտրային բանկից 2010 թվականի հունիսի 28-ից մինչև 2011 թվականի հունիսի 27-ն ընկած ժամանակահատվածում ստացել և անարգել տնօրինել են 3.664.175.000 ՀՀ դրամին համարժեք 9 միլիոն ԱՄՆ դոլար և 361.500.000 ՀՀ դրամ գումարի չափով վարկային միջոցներ, մի շարք բանկային և առևտրային գործարքներով, փոխանցումներով, փոխարկումներով թաքցնելով և խեղաթյուրելով դրանց ծագման աղբյուրը, տեղաշարժն ու պատկանելիությունը: Հանցավոր եղանակով ստացված եկամուտներն օրինականացնելու համար օգտագործվել է հանցավոր խմբի անդամների կողմից նախապես՝ 2010թ. գարնանը, օֆշորային գոտում հիմնադրված ընկերությունը, որի 33 տոկոսով բաժնեմասը պատկանել է եկեղեցու հիշյալ սպասավորին:

Հեղինակ՝ Իզաբել Սահակյան

Աղբյուր` Փաստինֆո