Փաստ ինֆո

Սա իսկական հետապնդում է: «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը անդրադառնալով Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ հարուցելուն:

«Սա ոչ միայն առանձին դիպված է, այլ քիչ թե շատ կարգապահ և օրինապահ դատավորներին սարսափեցնելու միջոց, որ հայտնի լինի՝ ինչ է իրենց սպասվում, եթե հանկարծ իրապես հավատարիմ մնան այդ երկու սկզբունքներին և չենթարկվեն իշխանություններին»,-ասաց Լարիսա Ալավերդյանը:

Վերջինս նկատեց ով էլ անձամբ չի ճանաչում Ալեքսանդր Ազարյանին, ապա նրա վաստակած վարկանիշն ամեն ինչի մասին խոսում է. «Տեսնում ենք, որ հենց այդ դատավորի նկատմամբ տեղի են ունենում բացահայտ, անթաքույց ճնշումներ: Նպատակը, սակայն, մեկին ճնշելը չէ: Նպատակն ամբողջ դատական իշխանության մեջ կարգապահության և օրինապահության սկզբունքներին հավատարիմ դատավորներին իրենց ապագան ցույց տալն է, եթե չենթարկվեն իշխանություններին»,-հավելեց Լարիսա Ալավերդյանը:

Հիշեցնենք, որ Արդարադատության նախարարությունը կարգապահական վարույթ է հարուցել Վերաքննիչ քրեական դատարանի դատավոր Ալեքսանդր Ազարյանի նկատմամբ, որն ունի ամենաբարձր վարկանիշը դատական համակարգում։

Հեղինկա՝ Հասմիկ Կոշկարյան

Աղբյուր` Փաստինֆո