Փաստ ինֆո

Նախ ուզում եմ ԱԺ նախագահի անաչառությունը հարցականի տակ դնել, որովհետև պարոն Միրզոյանն արդեն որերորդ անգամն է «Իմ քայլը» քայլը դաշինքի վիրավորական ելույթներին չի արձագանքում ու արձագանքում է միայն ընդդիմության ելույթներին։ Նորմալ է, դուք՝ ձեր նախագահությունը, դրանով բնականաբար ձեզ եք վնասում: Այս մասին այսօր Ազգային ժողովում ասաց «Լուսավոր Հայաստան» խմբակցության ղեկավար Էդմոն Մարուքյանը, որին ԱԺ նախագահը նախազգուշացում էր տվել՝ պատգամավորի հանդեպ անհարգալից արտահայտվելու համար:

Մարուքյանը շեշտեց՝ տպավորություն է, թե «Իմ քայլի» ձեռքն իշխանություն է ընկել ու չգիտեն ոնց օգտագործել:
Անդրադառնալով արտահերթ նիստին, որի մասին ընդդիմությունը նախապես չէր տեղեկացվել, այլ միայն դրա մեկնարկին զուգահեռ՝ Մարուքյանն ասաց, որ հարցումներ են արել ու դիմել կառավարությանը, պարզվել է՝Կառավարությունը արտահերթ նիստ էր գումարել, ԱԺ նախագահը դրա մասին իմացել է ու չի տեղեկացրել ընդդիմությանը:

«Արել եք այն, ինչ նախկինում միշտ արվել է: Հետո խռովել եք երևի, որ մինչ այդ տապալել ենք քվեարկությունը: Իշխանությունը՝ «Իմ քայլը» խմբակցությունը, կարող է խռովել, ԱԺ նախագահը չի կարող, նա պետք է լինի բոլորի ԱԺ նախագահը, բայց այդպես է ստացվել՝ նորմալ է, այդպես կաշխատենք»,-ասաց Մարուքյանը:

Աղբյուր` Փաստինֆո