Փաստ ինֆո

Առաջիկայում Բարձրագույն դատական խորհրդում քննարկման առարկա կդառնա Վերաքննիչ քրեական դատարանի դատավոր Ալեքսանդր Ազարյանի նկատմամբ ՀՀ արդարադատության նախարարության հարուցած կարգապահական վարույթը։ 

Ըստ տեղեկությունների՝ վարույթի հիմքում դռնփակ դատական նիստում ՀՔԾ պետ Սասուն Խաչատրյանի գործողությունների վերաբերյալ դատավորի գնահատականն է եղել եւ «Փաստինֆո»-ն դեռ ապրիլի 14-ին դիմել էր ՀՔԾ մամուլի ծառայությանը՝ պարզելու, թե արդյոք ՀՔԾ պետ Սասուն Խաչատրյանը գրավոր դիմել էր արդարադատության նախարարին՝ վարույթ հարուցելու համար։

Այս տեղեկատվությունը ՀՔԾ-ն առայժմ չի մեկնաբանում. Արդեն երկրորդ օրն է՝ պատասխան ստանալ դեռևս չի հաջողվել:

Ավելի վաղ տեղեկացրել ենք, որ Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ է հարուցվել արդարադատության նախարարության կողմից՝ ապրիլին: Մեր տեղեկություններով՝ կարգապահական վարույթի հարուցման պատճառը «5-րդ ալիք» ՀԸ սեփականատեր Արմեն Թավադյանի խափանման միջոցի գործով դռնփակ դատական նիստում հնչեցված գնահատականն է:

Այդ դատական նիստի մասին տեղեկատվության արտահոսքից հետո, ՀՔԾ-ից «Փաստինֆո»-ին հայտնել էին, որ իրենց միջև գործողություններն այսուհետ կլինեն բացառապես իրավական դաշտում:

Արձանագրենք, որ Ալեքսանդր Ազարյանը համարվում է ամենաբարձր վարկանիշ ունեցող դատավորներից մեկը։ Նա երկու տարի շարունակ ճանաչվել է տարվա ամենաբարձր վարկանիշ ունեցող դատավոր, իսկ 2020թ. ապրիլի 14-ի դրությամբ՝ կրկին առջեւում է ամենաբարձր վարկանիշով՝ 53 միավորով:

Նշենք, որ դատավոր Ալեքսանդր Ազարյանի նկատմամբ աննախադեպ ճնշումներն սկսվել են 2018թ օգոստոսին կայացված դատական ակտից հետո, որով արձանագրել էր, որ ՀՀ երկրորդ նախագահ Ռոբերտ Քոչարյանն ունի գործառութային անձեռնմխելիություն, ինչը չի հաղթահարվել և վերացրել նրա նկատմամբ ընտրված խափանման միջոցը՝ կալանավորումը։ Ճնշումների երկրորդ ալիքը սկսվեց 2020 թվականի մարտին, երբ բավարարեց Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը՝ նշելով, որ բացակայում է հիմնավոր կասկածը։

Աղբյուր` Փաստինֆո