Փաստ ինֆո

Կորոնավիրուսի տնտեսական հետևանքների չեզոքացման երրորդ միջոցառումը, որը վերաբերում է ՓՄՁ-ներին, ենթարկվել է փոփոխությունների: Այս մասին այսօր հրավիրված մամուլի ասուլիսի ժամանակ ասաց ՀՀ էկոնոմիկայի նախարարի մամուլի խոսնակ Աննա Օհանյանը:

Նրա խոսքով՝ արձագանքելով մի շարք գործարարների կողմից ստացված ահազանգերին և մտահոգություններին կառավարությունը որոշել է ընդլայնել շահառուների շրջանակը և որոշակի փոփոխություններ է կատարել չափորոշիչներում. «Եթե նախորդ կարգով սահմանվում էր, որ ծրագրի շահառու կարող են հանդիսանալ միայն այն բարեխիղճ հարկատու տնտեսվարողները, որոնք չեն ունեցել հարկային պարտավորությունները գանձելու վերաբերյալ վարչական վարույթ, ապա նոր փոփոխությամբ այն տնտեսվարողները, որոնց հանդեպ հարուցված է եղել վարչական վարույթ հարկային պարտավորությունները գանձելու վերաբերյալ, սակայն 2019 թվականի դեկտեմբերի 31-ի դրությամբ նրանք չեն ունեցել ժամկետանց հարկային պարտավորություն, նրանք ևս կարող են դիմել ծրագրից օգտվելու համար վճարելով վարկային միջոցների տրամադրման վճարը` փաստացի հատկացվող միջոցների 1 տոկոսի չափով»,-ասաց Աննա Օհանյանը:

Վերջինս նշեց, որ ծրագրում ևս մեկ փոփոխություն է իրականացվել, ինչը կնպաստի, որ ծրագրից ավելի շատ ՓՄՁ-ներ կարողանան օգտվել: Նախորդ կարգով սահմանվում էր, որ 2019-ի յուրաքանչյուր եռամսյակի շրջանառությունը չպետք է պակաս լինի ընդհանուր տարեկան շրջանառության 10 տոկոսից, ապա նոր որոշմամբ 2019 թվականի յուրաքանչյուր եռամսյակի շրջանառությունը չի կարող գերազանցել ընդհանուր շրջանառության գումարի 70 տոկոսը:

Աղբյուր` Փաստինֆո