Փաստ ինֆո

Աշխարհում տիրող համաճարակային իրավիճակից ելնելով հասարակական ու քաղաքական կյանքը տեղափոխվել է վիրտուալ դաշտ: Չունենալով որևէ ազդեցություն ու հենք իշխանության իրական կրողի՝ ժողովրդի, հետ քաղաքական օրակարգ ձևավորելու տոտալ լեգիտիմության բացակայության պայմաններում որոշ հանրահայտ քաղաքական ուժեր «ֆեյքերի» միջոցով փորձում են ՀՀ-ում ձևավորել կեղծ հանրային օրակարգ: Այս մասին այսօր ԱԺ-ում ասաց «Իմ քայլը» խմբակցության պատգամավոր Անդրանիկ Քոչարյանը:

Նա նշեց, որ այս կեղծ քաղաքական օրակարգը որևէ աղերս չունի իշխանության միակ կրողի ՝ ժողովրդի, հետ:
««Ֆեյքերի» միջոցով տպագրում են հոդվածներ, ֆեյքերը դրանց արձագանքում են, իսկ սպասարկող մամուլը արտատպում ու ձևավորում է հանրային «ֆեյք» կարծիք, նրանք փորձում են ձևավորել վիրտուալ ժողովրդավարություն, որտեղ մարդուն փոխարինում է կեղծիքը»,-ասաց Քոչարյանը:
Նա ընդգծեց՝ իրական մարդու, իրական հայրենիքի, իրական զինվորի կերպարին զուգահեռ ստեղծվում է արհեստական իրողություն, որը չունի ամուր հիմքեր ու կփլուզվի առաջին իսկ հարվածից:

Աղբյուր` Փաստինֆո