Փաստ ինֆո

Կառավարության սոցիալական աջակցության չորրորդ ծրագրին դիմելու համար պետք է մուտք գործել ssa.am կայք, մուտքագրել տվյալները և տեսնել արդյոք ծրագրի շահառու են հանդիսանում, թե ոչ, իսկ վճարումներն իրականացվում են բանկում: Այս մասին այսօր մամուլի ասուլիսի ժամանակ ասաց ՀՀ աշխատանքի և սոցիալական հարցերի նախարար Զարուհի Բաթոյանը:

Հիշեցնենք, որ ծրագիրը վերաբերում է մինչև 14 տարեկան երեխա ունեցող, գրանցված աշխատանքից հեռացվածներին:

Մասնավոր սեկտորում գրանցված աշխատանքից ազատվածների համար նախատեսված աջակցության ծրագրի շահառու է հանդիսանում 6723 մարդ. «7-րդ ծրագրի շրջանակն ընդլայնվել է: Այս ծրագրի շահառու արդեն կհանդիսանան ոչ միայն այն հղի կանայք, որոնք չեն աշխատում և նրանց ամուսինն ազատված է մարտի 13-ից մինչև մարտի 30-ն ընկած ժամանակահատվածում, այլև այն հղի կանայք, որոնց ամուսիններն ընդհանրապես չեն աշխատել մարտի 30-ի դրությամբ: Այս պահին ծրագրի շահառու է հանդիսանում 5957 հղի կին, բայց ցանկը դեռ թարմացվում է»,-ասաց Զարուհի Բաթոյանը:

Տուժած ոլորտների աշխատակիցներին վերաբերող աջակցության ծրագիրը մեկնարկել է երեկ և մի քանի ժամվա ընթացքում նախարարությունը ստացել է ավելի քան 45 հազար դիմում ֆիզիկական անձանցից, որոնցից 27 հազարը հաստատվել է: Երեկ է մեկնարկել նաև երեխաներին վերաբերող աջակցության ծրագիրը. «Այս ծրագրի շահառուների ցանկը դեռևս կազմվում է: Համակարգն այս պահին ժամանակավորապես դադարեցրել ենք, որովհետև դիմումների հոսքը բավական մեծ էր և սխալներ թույլ չտալու համար, այս պահին մի քանի ժամով դադարեցրել ենք, որից հետո օրվա ընթացքում նորից կվերսկսենք»,-ասաց նախարարը հավելելով, որ վերջին երկու ծրագրերի դեպքում հրապարակվելու է նաև շահառուների ցանկը և միայն այս երկու ծրագրերի դեպքում անհրաժեշտություն կա դիմում գրելու:

Աղբյուր` Փաստինֆո