Փաստ ինֆո

Բոլորի հետ բաց եմ համագործակցության համար և որևէ մեկի հետ անձնական խնդիր չունեմ։ Մամուլի ասուլիսի ժամանակ այս մասին ասաց ՀՀ քաղավիացիայի կոմիտեի նախագահ Տաթևիկ Ռևազյանը պատասխանելով հարցին ինչ հարաբերություններ է ունեցել ՀՀ վարչապետի ավիացիոն գծով նախկին խորհրդական Հակոբ Ճաղարյանի հետ։

Տաթևիկ Ռևազյանը ներկայացրեց մի քանի օրինակ, թե ինչու չի ստացվել իր և Հակոբ Ճաղարյանի համագործակցությունը. «Հանձնարարական ունեինք, որ պետք է համատեղ հայեցակարգ մշակենք ՀՀ-ի համար, բայց պարոն Ճաղարյանի կողմից կազմված հայեցակարգն իր համար վերջնական տարբերակն էր։ Երբ ասում էինք եկեք համատեղ այդ ամեն ինչն անենք, նա մերժում էր ու ասում, որ կամ իր ձևաչափով ենք աշխատում կամ ոչ մի։ Ինձ համար դա անընդունելի է։ Երկրի հայեցակարգը շատ կարևոր փաստաթուղթ է, որը վերջում բերելու է նրան, որ պետության համար ռազմավարություն է գրվելու և այստեղ կարևոր է բոլորի կարծիքը և թիմային աշխատանք իրականացնելը»,-ասաց Տաթևիկ Ռևազյանը։

Անդրադառնալով Հակոբ Ճաղարյանի հայտարարությանն այն մասին, որ երեք մասնագետի է առաջարկել կոմիտեին, ովքեր կպատրաստեին այս այցին, Տաթևիկ Ռևազյանն ասաց. «Որոշում կայացրեցինք չներգրավել այդ երեք անձին և մեզ համար որոշումը շատ պարզ էր։ Ունեինք երկու տարբերակ, որոնցից մեկն այն էր, որ երեք մասնագետները յոթ օրով Հայաստան էին գալու, տպելու էին փաստաթղթեր, 30 հազար դոլար էինք վճարելու և իրականում որևէ կոնկրետ հարց չէինք չէինք լուծելու։ Իրականում թիմը, որ եկավ ասաց` ինչ լավ է, որ ուղղակի վերջին վայրկյանին փաստաթղթեր չենք տպել։ Հիմնական խնդիրը փաստաթղթերում չէ, ինչքան նրանում է, որ մեր մասնագետները չեմ կարողացել փաստաթղթերը պատշաճ բացատրել։ Իսկ մեր տարբերակն այն էր, որ ներգրավեինք մասնագետ մի քանի ամսով 1 մլն դրամ վճարելով»,-հավելեց Տաթևիկ Ռևազյանը։

Աղբյուր` Փաստինֆո