Փաստ ինֆո

Քաղավիացիայի կոմիտեի նախագահ Տաթևիկ Ռևազյանը բարձրացված աղմուկի հետ կապված այդքան էլ մեղք չունի: «Փաստինֆո»-ի հետ զրույցում նման կարծիք արտահայտեց Քաղավիացիայի գլխավոր վարչության նախկին պետ Շահեն Պետրոսյանը:

Նրա խոսքով ունենք որոշակի դիտողություններ, որ մեր ավիաընկերություններն այնքան էլ չեն հետևում թռիչքային անվտանգությանը, տարբեր երրորդ երկրներում ապօրինի գործունեությամբ են զբաղված, լիցենզիաներ են ստանում և չգիտես ինչու վերահսկողություն չկա: ՔԳՎ նախկին պետի խոսքով` սա հին պատմություն է. «Սա սկսվել է նրանից, որ Ռոբերտ Քոչարյանը «Հայկական ավիաուղիներ»-ն ուղղակի վերացրեց, արհեստականորեն սնանկացրեց, և մենք մնացինք առանց սեփական ավիափոխադրողի: Հաճախ տարբեր կազմակերպություններ դիմել են մեր ավիացիոն իշխանություններին, որ ինչ եք անում, արտոնագիրը տալիս եք ու չեք վերահսկում: Ընդհանրապես 90-ականներին կարգը չէր նախատեսում արտոնագիր տալ այն ընկերություններին, որոնք երրորդ երկրում են  գործունեությունը ծավալելու, որովհետև անվերահսկելի են դառնում»,-ասաց Շահեն Պետրոսյանը:

Վերջինիս համար հատկապես զարմանալի է, երբ հիմա բոլոր ավիատորներին հուզում է այս ամենը, իսկ այն ժամանակ չէին խոսում. «Երևի մտածում են Տաթևիկն էլ չի վրադառնա: Միգուցե տեղի համար է կռիվ գնում, բայց սա ավելի շուտ աղմուկ է»,-ասաց Շահեն Պետրոսյանը՝ հավելելով, որ նախկինում ցանկացած սերտիֆիկացիա, արտոնագիր, օդանավի շահագործման փաստաթղթեր կաշառքի միջոցով էին ձեռքբերվում, ինչի պատճառով էլ չէին կարողանում վերահսկողություն իրականացնել:

Շահեն Պետրոսյանը գտնում է` այդ խնդիրները միշտ եղել են և վերահսկողությունն անհնար է, քանի որ մենք այն երկիրը չենք, որ կարողանա այլ երկրներում վերահսկել օդանավերի գործունեությունը:

Աղբյուր` Փաստինֆո