Փաստ ինֆո

Ազգային ժողովը քննարկում է «Լուսավոր Հայաստան» խմբակցության կողմից ներկայացված «Ձերբակալված և կալանավորված անձանց պահելու մասին» ՀՀ օերնքում լրացումներ կատարելու մասին օրենքի նախագիծը երկրորդ ընթերցմամբ ու ամբողջությամբ ընդունելու մասին հարցը:

«Այս նախագիծը տարիների պատմություն ունի, երբ պատգամավորները խոչընդոներ էին ունենում ձերբակալված և կալանավորված անձանց պահման հիմնարկներ այցելելիս»,-այս մասին այսօր ԱԺ նիստի ժամանակ ներկայացնելով նախագիծն ասաց «Լուսավոր Հայաստան» խմբակցության պատգամավոր Տարոն Սիմոնյանը:

Նա շեշտեց, որ օրենսդրությունում առկա դրույթը վերաբերում է միայն պատգամավորների մուտքին և ելքին, այսինքն պատգամավորը միայն մուտքի և ելքի իրավունք ունի և Արդարադատության նախարարության հիմնարկների մեկնաբանմամբ դա չի ենթադրում շփման, տեսակցության իրավունք:

Պետաիրավական հարցերի մշտական հանձնաժողովի անդամ Նիկոլայ Բաղդասարյանը հակադարձեց ասելով, որ խնդիրը կարգավորվում է «Ձերբակալված և կալանավորված անձանց պահելու մասին» օրենքի 48-րդ հոդվածով:

«Նշված հոդվածի առաջին մասն ասում է, որ ձերբակալվածների պահելու վայր և կալանավորվածների պահելու վայր մուտքի և ելքի կարգը սահմանում է պետական կառավարման լիազոր մարմնի ղեկավարը, այսինքն Արդարադատության նախարարը: Հաջորդ հոդվածում թվարկված են այն սուբյեկտները, որոնք առանց թույլտվության իրավունք ունեն ձերբակալավծաների և կալանավորվածների պահելու վայր մուտք ու ելք գործել»,-ասաց Բաղդասարյանը:

Նա շեշտեց, որ այս երկու հոդվածների վերլուծությունից բխում է, որ պատգամավորն ու մի շարք այլ պաշտոնյաներ իրավունք ունեն մուտք ու ելք գործել` ձերբակալված ու կալանավորված անձանց պահելու վայրեր, և այդ կարգը սահմանվում է Արդարադատության նախարարության կողմից:

«Այդ կարգը վաղուց սահմանվել է և օրինակ Վարդաշեն քրեակատարողական հիմնարկում ես նկատել եմ, որ կարգը պատի վրա փակցված է ու գրված է, որ պատգամավորն իրավունք ունի առանց որևէ մեկի թույլտվության մուտք ու ելք գործել, տեսակցել կալանավորված ու ձերբակալված անձանց հետ»,-ասաց պետաիրավական հարցերի մշտական հանձնաժողովի անդամը:

Աղբյուր` Փաստինֆո