Փաստ ինֆո

Հանրային տիրույթում պարբերաբար վերսկսում են մասնավորապես բարձրաստիճան պաշտոնյաներին տրվող պարգևավճարների ու վարձատրության մասին խոսակցությունները, և չեմ կարող հնչեցված կարծիքներն անարձագանք թողնել: Այս մասին այսօր Ազգային ժողովում ասաց ԱԺ փոխնախագահ Լենա Նազարյանը:

Նա նշեց, որ Հայաստանում պետական համակարգի աշխատակիցների արդար, համաչափ վարձատրության հարց կա. «Նկատի ունեմ ոչ միայն բարձրաստիճան պաշտոնյաների վարձատրության հարցը, այլև ամբողջ համակարգի՝ վարից վեր»:
Նազարյանն ասաց, որ երբ խոսվում է բարձրաստիճան պաշտոնյաների վարձատրության մասին, արդարացիորեն քննադատություն է հնչում, որ այդ հարցը պետք է դիտարկել նաև պետական համակարգի ներսում ու այլ հանրային ոլորտներում աշխատողների աշխատավարձերի բարձրացման համատեքստում:

«Իհարկե, դա ամենաարդար մոտեցումն է՝ բարձրացնել բոլորի աշխատավարձը համաչափ ու միանգամից: Շատ լեգիտիմ հարցադրում է և սրան իմ պատասխանը հետևյալն է՝այս պահին կառավարությունը կադրային քաղաքականության հարց է լուծում, որի վերջնական նպատակը բոլորի բարեկեցությունն է»,-ասաց ԱԺ փոխնախագահը:

Նա օրինակ բերեց առանց անուններ տալու. «Մի պաշտոնյան, որի աշխատանքի արդյունքում է նաև վերջին երկու տարում ավելացել համայնքային բյուջեն ու մանկապարտեզների դաստիարակների աշխատավարձերը հարազատ հոր առողջական խնդրի լուծման նպատակով ստիպված է մեկնել արտասահման՝ գումար վաստակելու համար: Կասեք, որ շատ մարդիկ կան, որոնք ընտանիքի ու հարազատների կարիքների համար արտագնա աշխատանքի են մեկնում, այո, բայց ո՞վ պետք է նպաստի այլոց խնդիրների ինստիտուցիոնալ լուծմանը, եթե ոչ հենց այդ նույն պաշտոնյան»:

Նազարյանն ընդգծեց՝ չենք կարող թույլ տալ, որ նման հիմնարկներում աշխատողներն ամեն պատահարի բերումով թողնեն քաղաքականության մշակումն ու իրագործումը և դուրս գան իրենց անձնական հրատապ հոգսերը հոգալու:

«Կան բազմաթիվ օրինակներ, երբ նախարարները կամ փոխնախարարները ստանձնել են պետական ծառայությունը՝ հրաժարվելով մասնավոր ոլորտում իրենց մի քանի անգամ բարձր աշխատավարձից և դա արել են գիտակցաբար՝ ոլորտի զարգացման մեջ ներդրում ունենալու մղումներով:

Իմ ասելիքն այն է, որ այսօր պետք է մարդկանց կայուն աշխատելու պայման ապահովենք, որպեսզի բարեփոխումները կայանան ու հարատև լինեն, քանի որ ոչ մի ոլորտ չի կարող զարգանալ մի քանի ամսում»,-ասաց ԱԺ փոխնախագահը:

Նա ընդգծեց, որ նախկինում պաշտոնյաների վարձատրության հարցը երբեք չի քննարկվել ու հասկանալի է, որ պաշտոնյաներն իրենց աշխատավարձի հույսին չեն եղել ու բազմապատիկ ավելի ստվերային եկամուտներ են ունեցել:

«Նախկինում պետական պաշտոնյան կախյալ վիճակում էր իր կուսակցությունից, օլիգարխի կոռուպցիոն համակարգից, այժմ պաշտոնյայի գործառույթը հանրային շահի սպասարկումն է, հետևաբար նա մեծ հաշվով պետք է կախյալ լինի հանրային, թափանցիկ, օրինական միջոցներից»,-ասաց Նազարյանը:

Աղբյուր` Փաստինֆո