Փաստ ինֆո

Անշուշտ, ցանկացած բռնություն դատապարտելի է իրավունքի ու բարոյականության տեսանկյունից, բայց մենք՝ որպես օրենսդիր մարմին, պետք է շահագրգռված լինենք, որ մեր բարի ցանկությունները պսակվեն հաջողությամբ, իսկ դրա համար անհրաժեշտ է պահպանել նորմատիվ իրավական ակտերի, ՀՀ Սահմանադրության պահանջները: Այս մասին այսօր ԱԺ-ում ասաց «Բարգավաճ Հայաստան» խմբակցության պատգամավոր Գևորգ Պետրոսյանը՝ անդրադառանալով բռնության կոչերին ու դրանց քարոզը քրեականացնելու նախագծին:

Նա շեշտեց, որ նախագիծն իրավական որոշակիության առումով մտորումների տեղիք է տալիս. «Ի՞Նչ է նշանակում հրապարակային, բնական է, կոչը հրապարակային է լինում, եթե ես տանը մի սենյակում ինքնամեկուսացվեմ ու սկսեմ սրան-նրան հայհոյել, սա կոչ չէ»:

Պետրոսյանն ընդգծեց, որ օրենսդրություն ընդունլիս պետք է հիմք ընդունել մարդու իրավունքների վերաբերյալ հանրաճանաչ դրույթները, բայց չպետք է մոռանալ, որ հայ ենք ու ունենք ազգային մտածողություն:

«Հիմա ես ընդամենը մի օրինակ կբերեմ, որը շատ անցանկալի է, բայց պետք է ասեմ. Մի քանի օր առաջ բոլորդ տեսել եք զինվորի համազգեստը պղծող այդ երկոտանու թռվռալը, ես չգտեմ նա ինչ ազգ է, բայց եթե զինվորի համազգեստը պղծել է ու ես ասեմ՝ դրա ականջը պետք է ոլորել կամ պատժել, ինձ սրա համար պիտի տանեն պատասխանատվության ենթարկե՞ն»,-ասաց ԲՀԿ պատգամավորը:

Աղբյուր` Փաստինֆո