Փաստ ինֆո

Փաստաթղթերում չկա որևէ ապացույց առ այն, որ ՀՀ-ում Արթուր Գևորգյանի հաշվառման հասցեում որևէ մեկը դուռը թակել է, ընտանիքի անդամին հարցաքննել, ծանուցագիր է հանձնել կամ որևէ բանավոր խոսակցություն է ունեցել՝ Արթուր Գևորգյանի՝ ՀՀ վերադառնալու և քննության ներկայանալու, իր նկատմամբ քրեական գործ հարուցելու, քննչական գործողությունների մասնակցելու համար: Այս մասին «Փաստինֆո»-ի հետ զրույցում ասաց Արթուր Գևորգյանի փաստաբան Հրանտ Անանյանը:

«Մեխանիկական մոտեցում է ցուցաբերվել: ՀՀ-ում չի անձը, հետևաբար՝ հարմար առիթ է նրան հեշտ կալանավորելու վերաբերյալ որոշում ստանալու համար: Ինչ-որ ձևական երկու ծանուցագրի առկայություն կար գործի մեջ, բայց չկա որևէ ապացույց, որ այդ ծանուցագիրը ինչ որ մեկն ստացել է: Անհայտ է՝ դա փոստին հանձնվել է, թե ոչ, փոստատարը փորձել է հանձնել, թե ոչ: Այսինքն՝ չկար որևէ ապացույց, որ որևէ մեկը հրաժարվել է ստանալուց և չկար որևէ ապացույց, որ այդ ծանուցագիրը հանձնվել է: Մինչդեռ՝ այդ իրավիճակներում իրավապահ մարմիններն առձեռն են տանում, ընթերակաների կամ ընտանիքի անդամների, հարևանների մասնակցությամբ արձանագրություն են կազմում:Այդ պաշտոնական արարողությունը կատարվում է, որպեսզի ապացույց լինի, որն այս գործով չկա»,- ասաց Անանյանը: Ըստ նրա` դա հիմնավորվում է, որ ոչ Արթուր Գևորգյանին, ոչ նրա ընտանիքի անդամին չի հանձնվել ծանուցումը, բացի այդ՝ Արթուր Գևորգյանի հեռախոսահամարը հասանելի է եղել:

Նրա խոսքով՝ եթե իրավասու մարմինը դիտարկել է, որ Արթուր Գևորգյանի գտնվելու վայրն անհայտ է, դա այդ մարմնի խնդիրն է, որովհետև դա օբյեկտիվ գնահատական չի: Ըստ Անանյանի՝ օբյեկտիվ գնահատական կլիներ, եթե նախաքննական մարմինը ձեռնարկեր անհրաժեշտ և բավարար գործողությունների և ընթացակարգերի ամբողջությունը և սպառվեին Արթուր Գևորգյանին հայտնաբերելու բոլոր ջանքերը, որից հետո միայն կարող էր այդ գնահատականը տալ և հետախուզում հայտարարեր, ինչն այս դեպքում չի արվել:

«Դա նորմալ չի իհարկե, բայց նորմալ է, որովհետև տարածում է ստացել, որովհետև մարդուն կալանավորելը՝ դրա եղածն ինչ է: Այդպիսի մոտեցում է: Կկալանավորենք, հետո կգտնենք, հետո կխոսենք»,- նշեց Անանյանը` նշելով, որ նախաքննական մարմինը նման մոտեցմամբ է առաջնորդվում:

Նա նաև տեղեկացրեց, որ պատրաստվում են բողոքարկել կալանավորման մասին որոշումը:
Ինչ վերաբերում է Արթուր Գևորգյանին որպես մեղադրյալ ներգրավվելու մասին որոշմանը, Անանյանն արձանագրեց. «Այն առանձնատունը, որ նրան վերագրվում է, որ գնել է 2019թ հունվարի 10-ին, իսկ մինչև հունվարի 14-ը հաշվետու անձ էր և մինչև հունվարի 14-ի ձեռքբերումներն ու ծախսերը պետք է արտացոլվեին հայտարարգրերում, ինչպես նաև՝ պետք է հայտարարգրերի համադրությամբ ողջամտորեն հիմնավորվեր հնարավոր գույքի ձեռքբերումը՝ օրինական: Խնդիրն այն է, որ որոշ ոչ պատշաճ, կցկտուր փաստաթղթեր են ստացվել, որ Արթուր Գևորգյանը հավակնություն է ցուցաբերել ձեռք բերելու գույք 2019թ. հունվարի 10-ին, բայց գործարք չի կնքվել հունվարի 10-ին և գույքի պետական գրանցում տեղի չի ունեցել հունվարի 10-ին և որևէ գումար ի սեփականություն չի փոխանցվել գույքը վաճառողին: Գույքի վաճառքը տեղի է ունեցել հունվարի 14-ից հետո, պետական գրանցում Արթուր Գևորգյանի անունով եղել է և գումարը փոխանցվել է մարտ ամսին, իսկ Քաղաքացիական օրենսգիրքը, այդ թվում՝ ՀՀ-ի, հստակ սահմանում է, որ խոշոր գույքի նկատմամբ անձի սեփականության իրավունքը ծագում է դրա պետական գրանցման պահից: Հետևաբար՝ քանի դեռ պետական գրանցում չի եղել, այդ գույքը չի կարելի որևէ ձևով գնահատել, որ այն գտնվում է Արթուր Գևորգյանի սեփականության ֆոնդում, որպեսզի նա այդ սեփականության ֆոնդում ի հայտ եկած գույքն արտացոլեր հաշվետվությունների մեջ»:

Բացի դրանից՝ Անանյանը նշեց, որ, քանի դեռ Արթուր Գևորգյանի կողմից գումար չէր փոխանցվել, բնական է, որ այդ գումարի նվազեցումները չպետք է արտացոլվեր պաշտոնատար անձի կողմից պարտադիր հաշվետվություններում:

«Իրավապահներն առանց երկար-բարակ մտորելու, առանց խորանալու, թե ամերիկյան սիստեմն ինչպիսին է՝ գումարի ձեռքբերման և ստացված փաստաթղերն ինչի մասին կարող են վկայել, հապշտապ, հունվարի 10-ը հարմար ամսաթիվ է եղել, անմիջականորեն հենց հունվարի 10-ը, այսինքն՝ զուտ անձի կողմից այդ գույքով հետաքրքրվելու ամսաթիվը դիտարկվել է որպես գույքի ձեռքբերման ամսաթիվ»,-ասաց փաստաբանը, ապա հավելեց, որ ապացույցները կհրապարակի առաջիկայում:

Ավելի վաղ տեղեկացրել ենք, որ ԱԺ նախկին պատգամավոր Արթուր Գևորգյանը որպես մեղադրյալ է ներգրավվել ՀՀ քրեական օրենսգրքի 314.1-րդ հոդվածի 2-դ մասով և 310.1 հոդվածի 1-ին մասով նախատեսված հանցավոր արարքներն առերևույթ կատարելու համար: Նրա նկատմամբ որպես խափանման միջոց է ընտրվել կալանավորումը: Այժմ Արթուր Գևորգյանը գտնվում է հետախուզման մեջ: Ըստ Դատախազության հաղորդագրության՝ ԱԺ նախկին պատգամավորը ՀՀ բարձրաստիճան պաշտոնատար անձանց էթիկայի հանձնաժողով ներկայացրած իր՝ 2018թ. գույքի, եկամուտների և փոխկապակցված անձանց, ինչպես նաև 2019թ. հունվարի 14-ին պաշտոնից ազատվելուց հետո պաշտոնական պարտականությունները դադարեցնելու օրվա դրությամբ առկա գույքի, եկամուտների և փոխկապակցված անձանց վերաբերյալ հայտարարագրում անփոփոխ հայտարարագրել է 50մլն ՀՀ դրամ, 1.6մլն ԱՄՆ դոլար և 150.000 Եվրո:

Մինչդեռ 2019թ. հունվարի 10-ին նա 1.525.000ԱՄՆ դոլարով, որի մի մասը՝ վարկային միջոցներով, ԱՄՆ-ում՝ մասնավորապես Գլենդեյլում, ձեռք է բերել առանձնատուն, ինչի մասին հայտարարագրման ենթակա տվյալը թաքցրել է 2019թ. հունվարի 14-ին պաշտոնից ազատվելուց հետո պաշտոնական պարտականությունները դադարեցնելու օրվա դրությամբ առկա գույքի, եկամուտների և փոխկապակցված անձանց վերաբերյալ ՀՀ բարձրաստիճան պաշտոնատար անձանց էթիկայի հանձնաժողով ներկայացրած իր հայտարարագրում:

Այսինքն Ա.Գեւորգյանը չի հայտարարագրել 1մլն ՀՀ դրամը գերազանցող հիշյալ անշարժ գույքը և հաշվետու ժամանակահատվածում ապօրինի հարստացել է, քանի որ 2019թ. հունվարի 10-ին ԱՄՆ-ում հիշյալ առանձնատան ձեք բերումով նրա գույքի ավելացումն էականորեն գերազանցել է նրա՝ վերը նշված հայտարարագրերում արտացոլված օրինական եկամուտները և ողջամտորեն չի հիմնավորվում դրանցով:

Հեղինակ՝ Իզաբել Սահակյան

Աղբյուր` Փաստինֆո