Փաստ ինֆո

Քիչ առաջ ավարտվեց կորոնավիրուսի շուրջ ստեղծված իրավիճակի հետ կապված մեր հերթական խորհրդակցությունը: Այս մասին այսօր ֆեյսբուքյան ուղիղ եթերի ժամանակ ասել է ՀՀ վարչապետ Նիկոլ Փաշինյանը:

Վարչապետի խոսքով երեկ ունեցել ենք 685 թեստ, որից դրական է եղել 28-ը: Նիկոլ Փաշինյանը նկատեց` կարևոր վիճակագրություն ունենք, որ առաջին անգամ դրական դեպքերը կրկնակի ավելի քիչ են, քան առողջացած դեպքերը. «Երեկվա դրությամբ 54 առողջացման դեպք ենք ունեցել:

Այս առումով այսօր ունենք 786 ակտիվ դեպք: Ակտիվ դեպքերի որոշակի նվազում ունենք, ինչը ևս առաջին անգամ է, երբ օրվա արդյունքով ոչ թե վարակակիր հիվանդների թիվն աճում է, այլ նվազում է»,-ասաց վարչապետը:

Վերջինս նշեց, որ կա նաև վատ նորություն: Գրանցվել է կորոնավիրուսից ևս երկու մահ: Մահվան դեպքերի միջին տարիքը 74.8 է:

Վարչապետն ընդգծեց, որ լավ նորությունների մասին ասում է, ոչ թե նրա համար, որ հասարակության զգոնությունը թուլանա և կրկին վարակի բռնկում ունենանք, այլ ցանկանում է նշել, որ այս վիճակագրությունը թույլ է տալիս մտածել, որ ունենք հնարավորություն ջարդելու վարակի ողնաշարը. «Մեզնից յուրաքանչյուրի անհատական պատասխանատվությունից շատ բան է կախված: Պարետատան նոր որոշման շրջանակներում տասնյակ հազարավոր մարդկանց հնարավորություն ենք տվել աշխատանքի վերադառնալ և այս փուլում առանձնահատուկ կարևորություն եմ տալիս գործատուների պատասխանատվությանը, թե որքանով են նրանք ապահովում պայմաններ իրենց իսկ ընկերությունների աշխատողների վարակման հնարավորությունները նվազագույնի հասցնելու համար: Սա չափազանց կարևոր է»,-հավելեց վարչապետը` կոչ անելով գործատուներին ձեռնարկել առանձնահատուկ հակահամաճարակային միջոցառումներ, որպեսզի կարողանանք վերջին օրերին արձանագրված դրական դինամիկան ոչ միայն պահպանել, այլև զարգացնել. «Մեր գործողություններով կարողանանք այնպես անել, որ համավարակի պիկը մեզ համար լինի թիկունքում և ոչ թե առջևում»,-ասաց Նիկոլ Փաշինյանը:

Վարչապետի հույս հայտնեց, որ հնարավորինս շուտ լավ եղանակ կլինի, ինչը մասնագետների ոչ 100 տոկոս երաշխավորությամբ, բայց նախնական գնահատմամբ պետք է դրական ազդեցություն ունենան համավարակի առումով:

Աղբյուր` Փաստինֆո