Փաստ ինֆո

ՀՀ քաղավիացիայի նախագահ Տաթևիկ Ռևազյանն այսօր մամուլի ասուլիսի ժամանակ ասաց, որ երբ հայկական ավիաընկերությունները դիմեցին դեպի Եվրոպա թռիչքային թույլտվություն ստանալու համար, ոչ բոլորն էին պատրաստ այդ քայլն անել և հենց այդտեղ են թերություններն արձանագրվել:

«Մենք ընդունում ենք, որ դա քաղավիացիայի կոմիտեի հիմնական թերությունն է, որովհետև եթե մենք օրինակ տեսչական ստուգումների ընթացքում նկատեինք և արձանագրեինք, որ այս ավիաընկերությունը խնդիր ունի և կասեցնեինք իրեն, ինքը չէր էլ կարողանա դիմել չվերթների համար: Մենք վերահսկող մարմին ենք, մենք պետք է առաջինը նկատեինք, որ ավիաընկերությունը խնդիր ունի: Ճիշտ չի, որ ավիաընկերությունը դիմի Եվրոպա, նոր հասկանանք, որ խնդիր ունենք: Մենք հասկացանք, որ մեզ մոտ այդ խնդիրն է եղել, ես անձամբ խնդրեցի վերահսկողական մարմինը գա և ստուգի բոլոր պրոցեսները, որ հասկանանք որտեղ է եղել բացթողումը, որովհետև դա մեր բուն գործառույթի հետ է կապված: Համաձայն եմ, որ ընդհանուր համակարգը խնդիր ունի»,-ասաց Տաթևիկ Ռևազյանը:

Անդրադառնալով EASA-ի զեկույցին ՔԱԿ փոխնախագահ Գալուստ Պողոսյանն ասաց, որ եղել է մոտ 42 դիտողություն, ինչը փոխնախագահը չհամարեց թերություններ. «Ընդհանուր առմամբ EASA-ի այցը զուտ գնահատման այց է եղել, այլ ոչ թե աուդիտ և գրեթե 42 արձանագրած դիտողություններին արդեն իսկ պատասխանել ենք: Դա ներկայացվել է գործակալությանը»,-ասաց Գալուստ Պողոսյանը:

Աղբյուր` Փաստինֆո