Փաստ ինֆո

Եվրոպական միության պատրաստած զեկույցում որևէ կերպ նշված չէ այն մասին, որ թերությունները վերջին երկու տարվա ընթացքում են հայտնաբերվել: Այս մասին մամուլի ասուլիսի ժամանակ ասաց Քաղաքացիական ավիացիայի կոմիտեի նախագահ Տաթևիկ Ռևազյանը:

Նրա խոսքով՝ նշված են կոնկրետ թերություններ, որոնք նկատել են փետրվարի 3-ից 7-ն ընկած ժամանակահատվածում իրականացրած այցելության ժամանակ: Ավելին՝ ԵՄ-ի կողմից ունեն հայտարարություն, որտեղ ղեկավար կազմը նշում է թերությունները կապ չունեն կոմիտեի նոր ղեկավարության հետ:

Ինչ վերաբերում է հայտնաբերված թերություններին, ՔԱԿ նախագահի տեղակալ Գալուստ Պողոսյանն ասաց, որ թերությունները բազմաբնույթ են.

«Օրինակ պարտավոր էինք և պետք է ներդնեինք զեկույցների համակարգ, որը թե' պարտադիր, թե' կամավոր զեկույցներ են բոլոր իրադարձությունների վերաբերյալ: Զեկույցները ներկայացվել են միայն լուրջ միջադեպերի ժամանակ: Կա պահանջ, որպեսզի իրականացվի մարդ-անհրաժեշտություն-աշխատանք հաշվարկ, որպեսզի իշխանությունները, կոմիտեն հասկանա, թե ինչ ծավալի աշխատանք ունի և ինչ քանակությամբ մասնագետներ են պետք: Ընդհանուր առմամբ աշխատանքը կատարվել է, բայց այն միասնական չի եղել: Այսինքն` յուրաքանչյուր վարչություն իր մոտեցումն է ունեցել, ինչը խնդիրներից մեկն է: Մոտեցումները եղել են ոչ միասնական, այնինչ պետք է մի ուղղություն լինի և աշխատանքը կարելի է ասել մի ձևով պետք է կազմակերպված լինի, այլ ոչ թե բաժանված տարբեր վարչությունների վրա: Ամեն ինչ պետք է արձանագրվի, ամեն ինչի մասին պետք է լինեն փաստարկներ, ընդ որում կոմիտեում շատ աշխատանքներ կատարվել են, պարզապես չեն արձանագրվել, որը մտահոգություն է առաջացնում եվրոպական կառույցների մոտ, թե ինչու դա չի արձանագրվում»,-ասաց ՔԱԿ նախագահի տեղակալը նշելով, որ կան նաև այլ թերություններ:

ՔԱԿ նախագահ Տաթևիկ Ռևազյանը նկատեց երբ հարց են տալիս այն մասին, թե ինչքան արագ կարող են այս խնդիրները լուծել, դա հիմնականում մտածելակերպի խնդիր է. «Ճիշտ է հարցը կարելի է արագ լուծել հեռախոսազանգի, անձնական միջոցով և այլն, բայց այստեղ շատ կարևոր է այդ ամեն ինչն արձանագրել: Մենք պետք է կարողանանք մեր ամբողջ պատմությունն ունենանք ՔԱԿ-ում: Հինգ տարի առաջ ինչ խնդիր է ունեցել, կարող է այդ հինգ տարի առաջվա խնդիրն ազդի այսօրվա խնդրի վրա, բայց այդ ամբողջ պատմությունը չի հավաքագրվել կամ ամեն վարչություն առանձին-առանձին է դա արել: Աշխատել են միասին, բայց տվյալները մի հարթակում չի եղել: Մտածելակերպը փոխելը դժվար է ասել որքան ժամանակ է անհրաժեշտ, բայց արդեն իսկ տեսել ենք կառույցի ներսում լուրջ փոփոխություններ: Մասնագետներ ենք ներգրավել դրսից, որ աջակցել են մեզ, բացատրել են և արդեն զգացվում է` մարդիկ սկսել են ուրիշ կերպ մտածել և աշխատել»,-ասաց Տաթևիկ Ռևազյանը:

Աղբյուր` Փաստինֆո