Փաստ ինֆո

2008թ-ի մարտի 1-ի դեպքերից հետո Հայաստանի քրեակատարողական հիմնարկներում, այսինքն ԱԱԾ մեկուսարանում հայտնվեցին մեր այսօրվա գործընկերները՝ Սասուն Միքայելյանը, Գագիկ Ջհանգիրյանը,և մեր դիտորդական խումբն այցելում էր բանտերում գտնվող քաղաքական գործիչներին ու պատգամավորներին, ում նկատմամբ քննիչները տեսակցության արգելքի որոշում էին կայացրել: Այն ժամանակվա գործող արդարադատության նախարարը չէր մեկնաբանում այնպես, ինչպես այս նորմը մեկնաբանվեց դրանից հետո: Այս մասին այսօր ԱԺ-ում ասաց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով պատգամավորների ձերբակալվածներին ու կալանավորվածներին տեսակցելու իրավունքին:

«2010թ-ի դեկտեմբերի 17-ին երկրում մի ահավոր բան տեղի ունեցավ՝ նախագահի հրամանագրով Հրայր Թովմասյանը նշանակվեց արդարադատության նախարար ու այդ նորմը սկսեց մեկնաբանել այնպես, ինչպես հիմա մեկնաբանում եք դուք, արդարադատության նախարարությունը»,-ասաց Մարուքյանը:

Նա շեշտեց, որ 2010թ-ից սկսած արդեն 10 տարի է, ինչ նորմը Հրայր Թովմասյանի նման են մեկնաբանում նրանից հետո եկած նախարարները ու հեղափոխությունից հետո այդպես է մեկնաբանում նաև գործող քաղաքական մեծամասնությունը:
«Այն ժամանակ, երբ արգելք կար, Փաշինյանը նախագիծ բերեց, որպեսզի հստակություն լինի, թույլատրվի պատգամավորին տեսակցել կալանավորված կամ դատապարտված անձի հետ, նախագիծը ներկայացրեց՝ մերժվեց, հիմա էլի բերում ենք ու էլի մերժվում է»,-ասաց ԼՀԿ ղեկավարը:

Նրա խոսքով, իշխանությունները հիմա այդ նույն նորմը մեկնաբանում են այնպես, ինչպես Հրայր Թովմասյանն էր մեկնաբանում ու ցանկացած ոք, ով նորմն այդ ձևով է մեկնաբանում իր համար Հրայր Թովմասյան է:
«Նա ըստ ձեզ ենթակա է հանրաքվեի միջոցով հեռացման, այդ թվում այստեղ բոլոր նրանք, ովքեր այդ նորմը նույն ձևով են մեկնաբանում: Այն ժամանակ էլ ես,Փաշինյանը ասում էինք՝ այ հարգելի Հանրապետականներ, իշխանափոխություն կլինի, քրեական գործեր կհարուցվեն, ձեզ կնստացնեն, դուք կարիք կունենաք, որ մենք այցելենք ձեզ, ասում էին չէ, դա չի լինի ու մերժում էին մեր նախագիծը, հիմա սա ինձ մոտ դեժավյու է առաջացնում: Էլի քրեական գործեր են լինելու, մարդիկ են լինելու ՔԿՀ-ներում, հնարավորություն տվեք ձեզ այցելենք այ ձեր ցավը տանեմ, թողեք գանք ձեզ տեսնենք այ ձեր կյանքին ղուրբան լինեմ, այ ձեր գլխին ղուրբան...ես ուղղակի ձեզ խնդրում եմ, մի՛ եղեք Հրայր Թովմասյան»,-ասաց Մարուքյանը:

Աղբյուր` Փաստինֆո