Փաստ ինֆո

Ազգային ժողովը քննարկում է «Լուսավոր Հայաստան» խմբակցության կողմից ներկայացված Հայաստանի Հանրապետության քաղաքացիական օրենսգրքում փոփոծություններ կատարելու մասին օրինագիծը:

Հիմնական զեկուցող Տարոն Սիմոնյանն ասաց, որ նախագծով առաջարկվում է 1262-րդ հոդվածի առաջին մասում ավելացնել երկրորդ պարբերություն, որտեղ կնշվի, որ ՀՀ երկքաղաքացու օրենքը ՀՀ իրավունքն է.

«Սրա հետ անուղղակիորեն կապված է նաև 1268-րդ հոդվածում կատարվող փոփոխությունը, որը պարզապես տեխնիկական բնույթ է կրում. Առաջարկում ենք մի բառ փոխել, որը մեր կարծիքով սխալ թարգմանության արդյունք էր. «Անչափահասների, անգործունակ կամ սահմանափակ գործունակ չափահաս անձանց նկատմամբ խնամակալություն կամ հոգաբարձություն սահմանվում և վերահսկվում է այն անձի անձնական օրենքով, որի կիրառմամբ սահմանվել է խնամակալությունը կամ հոգաբարձությունը»: Մենք առաջարկում ենք «կիրառմամբ» բառը փոխարինել նկատմամբ բառով, որովհետև նկատմամբ վերաբերում է այն անձին, ում մասին խոսվում է այս հոդվածում»,-ասաց Սիմոնյանը:

ԱԺ «Իմ քայլը» խմբակցության պատգամավոր, պետաիրավական հարցերի մշտական հանձնաժողովի անդամ Արթուր Դավթյանը հայտնեց, որ պետաիրավական հարցերի մշտական հանձնաժողովը նախագծին բացասական եզրակացություն է տվել. «Մենք սրա ընդունման անհրաժեշտությունը չունենք, որովհետև «Քաղաքացիության մասին» օրենքի համաձայն, եթե 183 օրից ավել անձն ապրում է ՀՀ-ում, ապա նրա անձնական օրենքը դառնում է ՀՀ իրավունքը»,-ասաց Դավթյանը:

Նա շեշտեց, որ լեզվաբանների հետ քննարկել է «կիրառմամբ» բառը «նկատմամբ» բառով փոխարինելու հարցը, և հղումը վերաբերվում է օրենքին, ուստի այդ փոփոխության կարիքը չկա:

ԼՀԿ պատգամավոր Տարոն Սիմոնյանը շեշտեց, որ Կառավարությունը դրական է արձագանքել նախաձեռնությանն ու նշել, որ այս փոփոխությունների անհրաժեշտությունը կա:

«Երկքաղաքացիության մասին օրենսդրական կարգավորումներով այս հարցը կարգավորված է, պարզապես պետք է քաղաքացիական օրենսդրությամբ դա ֆիքսենք որպես առավել բարձր իրավական ուժ ունեցող իրավական ակտ»,-ասաց Սիմոնյանը:

Նախագիծը 7-րդ գումարման 4-րդ նստաշրջանի օրակարգ չընդրկվեց 33 կողմ, 70 դեմ ձայներով:

Աղբյուր` Փաստինֆո