Փաստ ինֆո

ԱԺ «Բարգավաճ Հայաստան» խմբակցության պատգամավոր Միքայել Մելքումյանն առաջարկում է «Պետական նպաստների մասին» ՀՀ օրենքում փոփոխություններ և լրացումներ կատարել:

«Օրենքի նախագծում հիմնականում երկու կարևորագույն դրույթ ենք արձանագրում: Առաջարկում ենք ընտանեկան դրամագլխի կարգավորումները փոփոխության ենթարկենք ու ավելի արդիական դարձնենք նաև ելնելով ստեղծված իրավիճակից»,-ներկայացնելով նախագիծն ասաց Մելքումյանը:

Նա նշեց, որ 5-ից ավելի երեխաներ ունենալու դեպքում ընտանեկան դրամագլուխ կա, որը կազմում է մեկ 1 մլն դրամ: Եվ երեխայի մեկ տարին լրանալուց հետո ծնողները ամսական 50.000 դրամ են ստանում:

«Պրակտիկան ցույց է տալիս, որ գումարն ամիս-ամիս ստանալու դեպքում գլոբալ ծախսեր, օրինակ բնակարանի վերանորոգման և այլն հետ կապված, ծնողը հնարավորություն չի ունենում իրականացնել ու ենթադրում ենք, որ գումարը կարող ենք միանգամից տալ, որպեսզի ընտանեկան ծախսերը ծնողը միանգամից իրականացնի»,-ասաց Մելքումյանը:

Նա նշեց, որ առաջարկել են, որպեսզի բացի աշխատող մայրերից, նաև քաղաքաբնակ ու գյուղաբնակ չաշխատող մայրերը ստանան 18.000 դրամները, որոնք հուլիսի դառնալու են 26.500 դրամ, սակայն այս դրույթը կառավարությունը մերժել է:

«Սա մերժվել է երկու շարժառիթով, մեկն այն է, որ իրենք արդեն նախատեսում են պետական նպաստների օրենքում փոփոխություն ու հուլիսի 1–ից միայն գյուղաբնակ մայրերի համար կնախատեսվի այս վճարումը»,-ասաց ԲՀԿ պատգամավորն ու ընդգծեց, Կառավարությունն ասել է, որ քաղաքաբնակ մայրերին նույնպես հետագայում անդրադարձ արվելու է:

Մելքումյանն ընդգծեց, որ նախատեսում է հարցն այսօր քննարկելու երկու ընթերցմամբ, քանի որ սոցիալական իմաստով սա կարող է աջակցություն լինել հազարավոր մայրերի համար:

«Նախագծի ընդունման դեպքում նրանք միանգամից 1 մլն դրամը ստանալու են ու կարողանալու են ճգնաժամային վիճակում հոգալ իրենց ծախսերը»,-շեշտեց նախագծի հեղինակը:

Աղբյուր` Փաստինֆո