Փաստ ինֆո

ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանն այսօր Աժ-ում պարետ Տիգրան Ավինյանից հետաքրքրվել է, թե արդյոք չգրանցված օրավարձով աշխատողների խնդիրն ինչ-որ լուծում ստանալու է:

«Օրինակ 9-րդ միջոցառմամբ նախատեսում ենք աջակցություն երեխաների համար ու դա նույնպես վերաբերելու է չգրանցված աշխատողների երեխաներին, իսկ 11-րդ միջոցառմամբ 50 տոկոսի չափով փոխհատուցելու ենք մինչև 10.000 դրամ գազի սպառման ծավալներ ունեցող անձանց ծախսը, և մինչև 5000 դրամ էլեկտրաէներգիայի ծախսը, որի բաժանորդների թիվը հասնում է մոտավորապես 220.000-ի : Կարծում եմ բավականին մեծ խումբ մարդիկ են ընդգրկվելու այս ծրագրում»,-ասաց Ավինյանը:

Պարետը շեշտեց, որ չգրանցված անձանց վերաբերյալ տեղեկատվությունն առաջին հերթին պետք է տրամադրվի Պետական եկամուտների կոմիտեին, որպեսզի հնարավոր լինի հստակ պատկերը հասկանալ:

«Այդ անձանց քանակը, շրջանակը, սոցիալ-տնտեսական վիճակը պետք է իմանանք, ունենանք օբյեկտիվ ինֆորմացիա ու ցանկ ստանանք, լուծում գտնենք»,-ասաց Ավինյանը:

Նա ընդգծեց, որ հիմա շահում են այն անձինք ովքեր գրանցված են և այն տնտեսվարողները, ովքեր պատշաճ իրականացրել են իրենց հարկային պարտավորություններն ու գրանցել են աշխատողներին:

«Այսինքն` իրենք իրենց վարած պարկեշտ քաղաքականության պտուղներն են ստանում այս ճգնաժամային իրավիճակում: Ենթադրում եմ, որ մյուս աշխատողների համար ինչ-որ ձևաչափով այդ ինֆորմացիայի ստացումը կնախաձեռնենք»,-ասաց պարետը:

Աղբյուր` Փաստինֆո