Փաստ ինֆո

Ազգային ժողովը հատուկ նիստ է գումարել՝ քննարկելու արտակարգ դրությունը 30 օրով երկարացնելու հարցը:

Փոխվարչապետ, պարետ Տիգրան Ավինյանը հայտնել է, որ Հայաստանում մշտական բնակչության 12 տոկոսը կամ ավելի քան 353 հազար մարդ՝ ըստ տարիքի, գտնվում է ռիսկային խմբում՝ անկախ առողջական վիճակից:

«Երկրորդ տիպի շաքարային դիաբետ ունեցող անձանց թիվը ՀՀ-ում 77.418 է, սրտի իշեմիկ հիվանդություն ունի 71.025 քաղաքացի, հիպերտենզիա՝ 145.408 քաղաքացի: Այս թվերը միայն հայտնի, գրանցված դեպքերն են: Ամենառիսկային գոտում են գտնվում այն անձինք, ովքեր ունեն մի քանի խրոնիկ հիվանդություն ու գտնվում են բարձր տարիքային խմբում»,-ասաց պարետը:

Նա նաև տվյալներ հայտնեց քաղաքացիների աշխատանքի ու զբաղվածության վիճակի վերաբերյալ. «Գրանցված աշխատողների թվով ամենաշատ աշխատողներ ունեցող ոլորտներն են կրթությունը, առևտուրն ու մշակող արդյունաբերությունը: Այս թվաբանության մեջ չի մտնում իհարկե գյուղատնտեսությունը, որտեղ զբաղվածությունը հիմնականում ոչ ֆորմալ է: 15-ից 75 տարեկան աշխատանքային ռեսուրսների մեջ զբաղված բնակչության ավելի քան 50 տոկոսն առևտրի և ծառայությունների ոլորտում է, զբաղված բնակչության մեջ 60 տարեկանից բարձր անձինք կազմում են մոտ 137 հազար մարդ»:

Նա շեշտեց, որ եթե Կառավարությունը որևէ միջոցառում չձեռնարկեր, ապա վարակվածների թիվը կհասներ բնակչության 89 տոկոսին, Երևանում հոսպիտալացման ենթակա ծանրագույն դեպքերը կհասնեին 8200, իսկ վարակված կլիներ 110 հազար մարդ:

«Նման սցենարի դեպքում առողջապահական համակարգն ի վիճակի չէր լինի արձագանքել համավարակին նույնիսկ ընթացիկ դեպքերը սպասարկելու առումով:

Ուստի մեր առաջնային քայլերն են եղել՝ որոշել վարակի տարածմա կանխարգելման ռազմավարական մոտեցումները , գնահատել կորոնավիրուսային դեպքերի սպասարկման առողջապահական համակարգի պատրաստվածության աստիճանն ու կարիքները, նախանշել դեպքերի բացահայտման ու վարակման մեթոդաբանությունը տարբեր սցենարային զարգացումների համար...»,-ասաց Ավինյանը:

Աղբյուր` Փաստինֆո