Փաստ ինֆո

Արդեն իսկ գործարկվել է տեղորոշման այն գործիքը, որի շուրջ բազմաթիվ քննարկումներ ենք ունեցել։ Այս պահի դրությամբ 315 արձանագրված հիվանդի դեպքում գործիքը մեզ տվել է 3029 պոտենցիալ ինքնամեկուսացվող անձանց շրջանակ։ Այդ բոլոր անձանց հետ կապ է հաստատվել և այդ անձինք չեն գտնվել Համաճարակներ վերահսկման և կանխարգելման ազգային կենտրոնի ցուցակներում։ Նշանակում է, որ սրանք 3000 հավելյալ անձիք են, որոնք կարող են լինել 14 օրվա ընթացքում վարակակիր։ Այս մասին այսօր Ազգային ժողովում ասաց պարետ Տիգրան Ավինյանը:

Նա հայտնեց, որ կորոնավիրուսի հավելվածի մոտավորապես 60 հազար ներբեռնում է գրանցվել և 4900 թեստի արդյունքներ գտնվել են կարմիր գոտում, կապ է հաստատվել 1600-ից ավելի անձանց հետ և ավելի խորը վերլուծության արդյունքում 21 հոգի թիրախավորվել է, նրանք ուղարկվել են թեստավորման և 4-ի մոտ հաստատվել է կորոնավիրուս:

«Գործարկվել է նաև ինքնամեկուսացման ռեժիմի խախտման SMS գործիքը, ինչպես նաև այս ամբողջ համակարգը միացված է Առողջապահական համակարգի և ոստիկանության տվյալների բազային: Սա մեկ ընդհանուր համակարգ է»,-ասաց Ավինյանը:

Պարետն ընդգծեց, որ արտակարգ դրության երկարաձգմամբ ազատ տեղաշարժի սահմանափակումները պահպանվելու են, հանրային տրանսպորտը և միջմարզային տրանսպորտը շարունակելու են մնալ արգելված, արգելված է մնալու նաև օտարերկրյա քաղաքացիները մուտքը Հայաստան։

Նա նշեց, որ ԶԼՄ-ների աշխատանքը սահմանափակող դրույթները վերացվել են, քանի որ Կառավարությունը համարում է, որ այս փուլում ԶԼՄ-ներում նկատելի չէ մեծ ծավալի ապատեղեկատվության տարածումը: Ավինյանն ընդգծեց, որ ԶԼՄ-ների վերաբերյալ մոնիթորինգը շարունակական բնույթ է կրելու ու անհրաժեշտության դեպքում սահմանափակւոմները կրկին մտցվելու են:

«Արտակարգ դրության ռեժիմում երկարաձգվելու է ավտոճանապարհային կանոնների խախտման համար կալանք չկիրառելու դրույթը, սակայն սա չի նշանակում, որ այդ խախտումները չեն արձանագվելու ու արտակարգ դրության ավարտից հետո այդ կալանքները չեն գործելու»,-ասաց Ավինյանը:

Աղբյուր` Փաստինֆո