Փաստ ինֆո

ԱԺ «Լուսավոր Հայաստան» խմբակցության ղեկավար Էդմոն Մարուքյանը գտնում է ճիշտ չէ մարդկանց ուղղակի թողնել ու ասել, որ աշխատանքի տաքսիներով գնան: 

Այսօր հրավիրված ԱԺ հատուկ նիստի ժամանակ ընդդիմադիր խմբակցության ղեկավարն ասաց զանգել է մի շարք եվրապական երկրներ, որտեղ ամենախիստ սահմանափակումներն են գործում, սակայն մետրոն շարունակում է իր աշխատանքը: Էդմոն Մարուքյանը, դիմելով ՀՀ փոխվարչապետ, պարետ Տիգրան Ավինյանին, առաջարկեց վերականգնել Երևանի մետրոպոլիտենի և հանրային տրանսպորտի աշխատանքը. «Այն ոլորտները, որոնց աշխատանքը թույլատրված է, այդ ոլորտներում աշխատող մարդիկ չեն կարող տաքսիներով գնալ: Բացի այդ տաքսու մեջ ավելի հեշտ է վարակվել, քան մետրոյում սոցիալական հեռավորությունը պահելով: Ընդ որում տրանսպորտում նախկին ծանրաբեռնվածությունը չկա, քանի որ համեմատաբար քիչ մարդ է աշխատանքի գնում»,-ասաց Էդմոն Մարուքյանը:

ՀՀ պարետ Տիգրան Ավինյանը, սակայն, շրջանցեց պատգամավորի հարցի սոցիալական կողմը և ասաց. «Մենք մարդկանց ասում ենք մնացեք տանը և առհասարակ հնարավորության դեպքում որևէ տեղ մի գնացեք և նույնիսկ աշխատանքի: Որովհետև նույնիսկ եթե գնում եք աշխատանքի, վարակի տարածման հնարավորության մասին պետք է իրազեկված լինեք: Կարևոր գործունեության տեսակներ, որոնք կենսականան նշանակություն ունեն, չենք կարող ուղղակի բաց չպահել: Ինչ վերաբերում է նրան, որ տաքսիում վարակվելու հավանականությունն ավելի մեծ է, քան տրասնպորտում, կարծում եմ նման պնդումը վիճարկելի է: Հանրային տրանսպորտում, հատկապես գազելներում շատ անձինք միաժամանակ նույն նեղ տարածության մեջ են գտնվում, օգտվում նույն բռնակներից:

Աշխարհում դեռևս վերջնական վերլուծություն չկա, թե վարակի տարածման հնարավոր աղբյուրները որոնք են: Նախնական տվյալներով վարակի տարածման ամենահավանական աղբյուրները եղել են բենզալցակայանները, հանրային տրանսպորտը»,-ասաց Տիգրան Ավինյանը:

Ըստ էության պարետն այդպես էլ չպատասխանեց ՀՀ քաղաքացուն հուզող հարցին այն է, եթե հանրային տրանսպորտը և մետրոն չի գործելու, ապա ինչպես գնալ աշխատանքի: Արդյոք նվազագույն կամ միջին աշխատավարձով ապրող ՀՀ քաղաքացիները, որոնք աշխատում են այն ոլորտներում, որոնց գործունեությունն արգելված չէ, կարող է իրեն թույլ տալ ամեն օր երկու անգամ օգտվել տաքսի ծառայությունից աշխատանքի գնալու և տուն վերադառնալու համար: Գուցե հանրային տրասնպորտի աշխատանքն իսկապես վտանգավոր է այս պարագայում, սակայն եթե պետությունն արգելում է դա, բայց միևնույն ժամանակ մի շարք ոլորտներում վերացնում սահմանափակումները, ապա պետք է կարողանա նաև այլընտրանք առաջարկել այդ ոլորտներում ներգրավված հարյուրավոր աշխատողներին: Հակառակ դեպքում նրանց մնում է ամբողջ աշխատավարձը ծախսել տաքսիների վրա, ինչը հավասարազոր է չաշխատելուն:

Նշենք, որ պարետի որոշմամբ ապրիլի 13-ից հանվելու են տնտեսական գործունեության որոշ տեսակների նկատմամբ գործող սահմանափակումները: Մասնավորապես մշակող արդյունաբերության հատվածում թույլատրվելու է ծխախոտային արտադրատեսակների արտադրությունը, ցեմնտի, կրի, գիպսի և գաջի արտադրությունը, բետոնից, ցեմենտից և գիպսից շինվածքների արտադրությունը, մետաղե կոնստրուկցիաների և դրանց մասերի արտադրությունը, շինարարությունը:

Աղբյուր` Փաստինֆո