Փաստ ինֆո

Մեղրիի զորամասում տեղի ունեցած անհնազանդության գործով 16 զինծառայողի նկատմամբ դատախազը քրեական հետապնդումը դադարեցրել է եւ նրանց մասով վարույթը կարճել: Այս մասին «Փաստինֆո»-ի գրավոր հարցմանն ի պատասխան հայտնել են ՀՀ քննչական կոմիտեի զինվորական քննչական գլխավոր վարչությունից:

Հիշեցնենք, որ Մեղրիի զորամասում մոտ մեկ տարի առաջ` 2019 թ. մարտին, արտառոց դեպք էր գրանցվել, շուրջ 200 զինվոր լքել էր զորամասի տարածքը` հրաժարվելով ենթարկվել սպայական անձնակազմի ցուցումներին: Պարզվում է` մի խումբ զինվորներ փորձել էին 90-ականների բարքերով զորամասում իրենց կարգը դնել, հատուկ պայմաններով առաջնորդվել, առանձին շորերով ծառայել, առանձին սննդակարգով ապրել։ Երբ սպաները դա թույլ չէին տվել, այդ զինծառայողներն իրենց համածառայակիցներին դրդել էին ըմբոստության, այն է` 2019 թ. մարտի 17-ին հրաժարվել էին ենթարկվել զինվորական ծառայության օրվա կարգացուցակին, իսկ ժամը 22:30-ին, երբ հայտարարվել էր քուն, մոտ 200 զինծառայող դուրս է եկել զորամասի տարածքից, ու միայն զորամասի հրամանատարի և ՌՈ աշխատակիցների հորդորների արդյունքում վերադարձել զորամաս:

«ՀՀ ԶՈւ-երում կարգազանցությունները եւ անհնազանդությունները անթույլատրելի են եւ պատժվելու են օրենքի ողջ խստությամբ: Զորամասի վերադաս հրամանատարության կողմից անցկացվել է համապատասխան ծառայողական քննություն եւ որոշվել է պատժել ինչպես շարքային զինծառայողների, այնպես էլ հրամանատարական կազմին: Մի քանի սպաներ պաշտոնանկ են արվել:
Զգուշացնում ենք, որ ԶՈւ-երի կարգապահության ու մարտունակության նկատմամբ ցանկացած ոտնձգություն իրականացնող զինծառայող, հետայսու էլ խստագույն պատժվելու է: Նման երեւույթներն անթույլատրելի են», - ֆեյսբուքում գրել էր ՀՀ ՊՆ խոսնակը:

Իսկ 2019 թ. Մարտի 27-ին դատախազությունը «Փաստինֆո»-ին տեղեկացրել էր, որ տեղի ունեցած կարգազանցության դեպքի առթիվ հարուցվել է երկու քրեական գործ։ Առաջին գործը հարուցվել է ՀՀ ՔՕ-ի 364-րդ հոդվածի 2-րդ մասով` մի խումբ անձանց կողմից զինվորական ծառայությունից կամ դրա առանձին պարտականությունները կատարելուց հրաժարվելը, որը զուգորդվել է դրանց փաստացի դադարեցմամբ, երկրորդը՝ 375-րդ հոդվածի 1-ին մասով` պետի կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը: Նշված երկու քրեական գործերով էլ նախաքննության կատարումը հանձնարարվել էր ՀՀ քննչական կոմիտեի զինվորական քննչական գլխավոր վարչությանը:

«Փաստինֆո»-ն գրավոր հարցում էր ուղարկել` պարզելու, թե ինչ ընթացք են ստացել քրեական գործերը: Արդյունքում պարզվեց, որ քրեական գործերը միացվել են մեկ վարույթում, որի շրջանակներում մեղադրյալների մեծ մասի նկատմամբ քրեական հետապնդումը դադարեցվել է: «13 զինծառայողի վերաբերյալ հսկողություն իրականացնող դատախազի որոշմամբ դադարեցվել է քրեական հետապնդումը՝ ՀՀ քրեական դատավարության օրենսգրքի 37-րդ հոդվածի 1-ին մասի հիմքով, (այն է՝ գործուն զղջալու, հաշտվելու կամ իրադրության փոփոխման հիմքով - խմբ.): Մեկ զինծառայողի նկատմամբ քրեական հետապնդումը դադարեցվել է ՀՀ քրեական դատավարության օրենսգրքի 35-րդ հոդվածի 1-ին մասի 1-ին կետով եւ 2 զինծառայողի նկատմամբ` ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետով՝ (հանցագործության դեպքի ու հանցակազմի բացակայության հիմքով- խմբ),- հայտնել են ՔԿ-ից:

Դատախազը կարճել է նաեւ զորամասի հրամանատար, գնդապետ Ռ. Սարգսյանի մասով վարույթը եւ դիրքը չարաշահելու համար քրեական հետապնդումը դադարեցրել` գտնելով, որ նրա գործողություններում բացակայում է հանցակազմը: Սպայական անձնակազմից միակ մեղադրյալը գումարտակի հրամանատար, փոխգնդապետ Ջ. Մկրտչյանն է, որի նկատմամբ որպես խափանման միջոց էր ընտրվել ստորագրությունը չհեռանալու մասին:

ՔԿ-ի տեղեկացմամբ` զորամասում կարգազանցության դեպքի վերաբերյալ դատարան է ուղարկվել մեկ քրեական գործ, որով որպես մեղադրյալ անցնում են նշված փոխգնդապետն ու 4 պարտադիր ժամկետային զինծառայող: «Փաստինֆո»-ն դատական տեղեկատվական համակարգից տեղեկացավ, որ գործը մակագրվել է դատավոր Նապոլեոն Օհանյանին:

Զորամասում ըմբոստության պատճառները, նպաստած պայմանները վեր հանելու, վերացնելու վերաբերյալ նախաքննական մարմինը միջնորդություն դեռ չի ներկայացրել ՊՆ-ին: Մեր հարցին ի պատասխան ՔԿ-ից հայտնել են, որ «Քրեական գործի նախաքննությունը շարունակվում է, ուստի քննության արդյունքներով հանցագործությանը նպաստող հանգամանքները քննարկելու և վերացնելու վերաբերյալ ՊՆ միջնորդագիր դեռևս չի ուղարկվել»:

Հեղինակ` Իզաբել Սահակյան

Աղբյուր` Փաստինֆո