Փաստ ինֆո

Ունենք այսօրվա դրությամբ բավականին լուրջ ճգնաժամային իրավիճակ, բայց իրավիճակի կառավարմանը նստած են ոչ արհեստավարժ մարդիկ, ովքեր ի վիճակի չեն նույնիսկ ոչ ճգնաժամային իրավիճակներում որոշակի խնդիրներ լուծելու, ուր մնաց ճգնաժամային իրավիճակներում: Այս մասին «Փաստինֆո»-ի հետ զրույցում ասաց հոգեբան Միհրդատ Մադաթյանը՝ անդրադառնալով Կառավարության կողմից հակասական տեղեկատվության տրամադրելուն և դրա հնարավոր հոգեբանական ազդեցությանը հասարակության վրա:

Նշենք, ապրիլի 8-ին ՀՀ վարչապետ Նիկոլ Փաշինյանը հայտարարել էր, թե քիչ վարակակիրներ հայտնաբերելու վիճակագրությունը պահպանվելու դեպքում կնշանակի «կորոնավիրուսի պիկը հաղթահարել ենք եւ պիկը եղել է մարտի 31-ին, ապրիլի 1-ին» եւ կարելի է մտածել սահմանափակումները թուլացնելու մասին: Իսկ առողջապահության նախարար Արսեն Թորոսյանը ապրիլի 10-ին ճիշտ հակառակ հայտարարությամբ հանդես եկավ՝ նշելով, որ վարակի տարածումը վերահսկողությունից դուրս է եկել։ «Նախկինում Հայաստանում օրական հայտնաբերվում էր կորոնավիրուսի 50 դեպք, բայց բոլորը մեկ աղբյուրից էին: Հիմա հայտնաբերվում է 16, 20 դեպք, բայց 10-20 տարբեր աղբյուրներից: Վիրուսի շրջանառությունը, որպես այդպիսին, վերահսկողությունից դուրս է եկել»,- ասուլիսում ասել էր առողջապահության նախարարը։

Մադաթյանը նշեց, որ ժողովրդի մի շերտ կա, որն ի սկզբանե չէր հավատում այս իշխանությանը և կար մի շերտ, որը կուրորեն հավատում էր իշխանությանը և այժմ ընկած է երկընտրանքային իրավիճակի մեջ և չի հասկանում՝ որ մեկին հավատա և սկսում է հավատալ անձի դոմինանտությամբ, այլ ոչ թե՝ ինֆորմացիայի հավաստիությամբ:

«Այսինքն՝ եթե ինչ-որ մեկի համար Արսեն Թորոսյանն ավելի կարևոր է, քան Նիկոլ Փաշինյանը, ինքը հավատում է Արսեն Թորոսյանի տված ինֆորմացիային, մյուսն էլ՝ Նիկոլ Փաշինյանի տված ինֆորմացիային, կամ էլ այն, ինչ-որ իրեն ձեռք է տալիս: Օբյեկտիվ իրականության մասին այսօր խոսելը ծիծաղելի կլինի, որովհետև ունենք իրար հակասող ինֆորմացիա տվող, որը հնարավոր չէ իմի բերել և ընդհանուր հայտարարի գալ»,- ասաց Մադաթյանը:

Հոգեբանի կարծիքով՝ ճգնաժամը մենք մի փոքր ավելի ծանր կտանենք, քանի որ մենեջմենթը չի արվում այն որակի և կարգավիճակի մեջ, որը պետք է արվեր, որովհետև այս դեպքում մեզ ավելի ուժեղ առաջնորդ էր պետք, որը կկարողանար ճիշտ մենեջմենթ, հարաբերություններ ձևավորել մեր գործընկերների, հարևանների հետ, որպեսզի հասարակ ժողովուրդն այդքան սուր չզգար ճգնաժամն իր մաշկի վրա:

«Մենք տեսնում ենք, որ հենց ունենում ենք ճգնաժամ, մեր վարչապետը հրաժարվում է օրավարձով աշխատողներից, ասում է, որ նման բան չկա, չնայած՝ հեղաշրջումն իրականացվել է հենց այդ օրավարձով աշխատողների կողմից, այդ մարդիկ են օգնել նրան, որ նա գա իշխանության:

Այսօրվա դրությամբ՝ պարգևավճարներից չենք հրաժարվում, շարունակվում են երկակի ստանդարտները: Քաղաքապետարանը կամ նախարարությունը պետք է ստանա, իսկ ուսուցիչներին մերժում են այդ պարգևավճարների մասով»,-ասաց Մադաթյանն ու ավելացրեց. «Ասել, որ մենք այսօր ունենք ժողովրդավարական, դեպի ժողովուրդն ուղղված կամ կրիզիսից դուրս գալու մենեջմենթ, մի փոքր դժվար կլինի այս իրավիճակում»:

Նրա խոսքով՝ այսօրվա իշխանության պոպուլիզմը բերեց նրան, որ խուճապի մթնոլորտ ձևավորվի ժողովրդի մոտ:

«Պոպուլիզմի առաջին կոմպոնենտներից մեկը առաջինն ինֆորմացիան հայտնելու մղումն է, որը կա այսօրվա իշխանությունների մոտ: Տեսնում ենք, որ ինֆորմացիան ժողովրդին չի տրվում համապատասխան ձևով: Երբ որ առաջին դեմքը տալիս է խուճապ սփռելու մասին ինֆորմացիա՝ մահերի մասին և այլն, ապա ժողովրդի մոտ անգիտակցական տպավորություն է ստեղծվում, որ մենք այսօր այնպիսի դժվար իրավիճակի մեջ ենք հիմա, որ առաջին դեմքն է զբաղվում այս հարցերով»,- ասաց հոգեբանը:

Նրա խոսքով՝ հակասական արտահայտություններ Նիկոլ Փաշինյանը կատարել է սկսած 2018թ.-ից, օրինակ՝ արագաչափերի, կարմիր գծերի, ում շունն է, թու-թու-թու և այլն:

«Ժողովուրդն իրականում ադեկվատ գնահատական է տալիս: Եթե նկատեք, այսօրվա իշխանությունները ժողովրդին դարձել են անհետաքրքիր: Արդեն վարչապետի լայվերը նայողների քանակը խիստ նվազել է, դարձել է անհետաքրքիր, հիմնականում նայում են ոչ թե Հայաստանի ժողովուրդը, այլ՝ սփյուռքահայերը, որոնք այս իրավիճակի հետ որևէ կապ չունեն: Այսինքն՝ գնում են Ամերիկայի կառավարությունից իրենց 1000-2000 դոլար օգնությունը ստանում են, հետո փորձում են միջամտել մեր ներքին խնդիրներին, առանց հասկանալու, որ մեզ մոտ այդ 26 հազար դրամը, որը կառավարությունը տրամադրել է, եղել է ընտրովի: Շատերը, որոնք նույնիսկ մտնում են այդ նորմատիվի մեջ, չեն կարողանում ստանալ, այսինքն՝ կայքը չի աշխատում և այլն»,- նշեց հոգեբանը:

Նրա խոսքով՝ կա հակասող ինֆորմացիա, աբսուրդի հասնող կոչեր:

«Տեսեք՝ 2018թ.-ին կոչ էր արվում, որ մինչև Քոչարյանը չնստի, ոչ ոք լավ չի ապրելու, հիմա Քոչարյանը նստած է և ոչ մեկը դեռ լավ չի ապրում, ավելի վատ են ապրում: Այսօրվա դրությամբ՝ երկրորդ նախագահը, գտնվելով տարիքային խոցելի խմբում, իշխանությունը որևէ բան չի անում, մի բան էլ՝ դատավորը գնում է քիթը վիրահատելու, որ դատը հետաձգվի: Այս կարիկատուրան, որը տեղի է ունենում, երգիծանք է, սա մենեջմենթ չէ: Իհարկե, սա առանց կորոնավիրուսի առաջացրած ճգնաժամի էլ բերելու էր ճգնաժամի: Սրան էլ գումարվեց կորոնավիրուսը:

Սրա տակից դուրս գալու համար շատ լուրջ պետք է մտածել և չեմ կարծում, որ այսօրվա դրությամբ որևէ մեկն ուրախությամբ կստանձներ երկրի ղեկավարությունը: Մենք անցած տարի ունեինք խնդիր, երբ Նիկոլ Փաշինյանի հետևորդներն ուրախությամբ ասում էին՝ տեսեք, թե ոնց Պուտինին կզցրեց, ինքը չգնաց դիմավորելու, Պուտինը եկավ և այլն: Մենք այսօրվա դրությամբ ուրախ ենք, որ մեր մեծ ընկերը մեզ օգնություն է տրամադրում, որով մենք կարող ենք մեր խնդիրները որոշակիորեն լուծել: Այսինքն՝ ընկերություն անելուց և օգնություն վերցնելուց մենք ուրախ ենք, բաց դիմավորելուց պետք է պատշաճության կանոնները ոտնահարենք: Այս ամենը կարիկատուրա է»,- նշեց Մադաթյանը՝ հավելելով, որ նույն պոպուլիզմը եղել է նաև Նիկոլ Փաշինյանի՝ ընդդիմադիր լինելու տարիներին:

«Նույն պոպուլիզմով Նիկոլ Փաշինյանն ասում էր՝ Սերժ Սարգսյանը կտրված է իրականությունից, այսօր ինքն է կտրված իրականությունից՝ փորձում է իր կյանքը վայելել: Պոպուլիզմ է, իրականում ոչ մի տրամաբանական քայլեր գոյություն չունեն և չեն կարող ունենալ»,- ասաց Մադաթյանը:

Աղբյուր` Փաստինֆո