Փաստ ինֆո

Որոշում է կայացվել ապրիլի 13-ից ամբողջությամբ թույլատրել բացօթյա շինարարական աշխատանքների գործունեությունը, ծխախոտային արտադրատեսակների արտադրությունը, իսկ ապրիլի 20-ից հետո կվերականգնվի տեքստիլ ոլորտի, տնտեսական խանութների գործունեությունը: Այս մասին այսօր ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը:

«Այստեղ մեզ համար ամենառիսկային խումբը տեքստիլ ոլորտն է, որովհետև, գիտեք, այսօրվա մեծ թվերի հիմնական տանող ուժը տեքստիլ արտադրությունն է եղել, բայց մենք հասկանում ենք նաև, որ մարդիկ պետք է աշխատեն ու առաջիկայում ավելի մանրամասն խորհրդակցություններ կանցկացնենք տեքստիլ ոլորտի մեր գործընկերների  հետ, որպեսզի կարողանանք նրանց ցույց տալ, թե ինչ կանխարգելիչ աշխատանքներ կան, որպեսզի այս իրավիճակում արտադրությունը հնարավորինս անվտանգ լինի»,-ասաց վարչապետը:

Անդրադառնալով ապրիլի 24-ի միջոցառումներին, նա նշեց, որ քաղաքացիների մասնակցությունը դրան պետք սահմանափակվի, որովհետև սովորական ընթացակարգով առաջնորդվելու դեպքում  համաճարակի անվերահսկելի բռնկում կլինի:

«Ապրիլի 24-ին տեղի կունենան միայն արարողակարգային միջոցառումներ, այսինքն` այն պաշտոնյաներն, ովքեր արարողակարգային անելիք ունեն, դա կանեն: Սա վերաբերում է նաև մայիսի 8-ին և 9-ին, բնականաբար մայիսի 1-ի հետ կապված էլ զանգվածային միջոցառումներ չեն լինի: Ես խնդրում եմ, որ մեր հայրենակիցները ըմբռնմամբ մոտենան այս որոշումներին»,-ասաց Փաշինյանը:

Աղբյուր` Փաստինֆո