Փաստ ինֆո

Երևանի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, գրավ է կիրառել թմրամիջոցների ապօրինի շրջանառության մեջ մեղադրվող անձի նկատմամբ՝ որպես գրավի չափ սահմանելով 1 մլն ՀՀ դրամը։ Դատարանը իրացնելու նպատակով թմրամիջոց ձեռք բերողին կալանքից ազատելիս հաշվի է առել մեղադրյալի առողջական վիճակը և կորոնավիրուսի համավարակի պատճառով ստեղծված իրավիճակը։ Փաստաբան Արմեն Հայրապետյանը «Փաստինֆո»-ի հետ զրույցում ասաց, որ իր պաշտպանյալն ունի առողջական մի շարք խնդիրներ, բացի այդ՝ շուրջ 1 տարի է գտնվում է կալանքի տակ: 

Դատարանը հաշվի է առել, որ կորոնավիրուսի համավարակով պայմանավորված դատական նիստերը կարող են չկայանալ և, որ ամբաստանյալի հիվանդության պայմաններում հնարավոր վարակումը մեծացնում է կյանքին ու առողջությանը սպառնացող վտանգը:

Ամբաստանյալին մեղսագրվում է ծանր հանցագործություն, որի համար քրեական օրենսգրքով նախատեսված է ազատազրկման ձևով պատիժ՝ երեքից յոթ տարի ժամկետով, ինչը դատարանին թույլ է տվել գալու այն հետևության, որ ամբաստանյալը գտնվելով ազատության մեջ, կարող է թաքնվել վարույթն իրականացնող մարմնից, միաժամանակ դատարանը հարկ է համարել նշել, որ տղամարդն արդեն մեկ տարուց ավել է գտնվում է անազատության մեջ և թեև պատժի կրումից պայմանական վաղաժամկետ ազատվելու օրենքով սահմանված ժամկետները դեռ չեն սպառվել, այնուամենայնիվ կորոնավիրուսի համավարակով պայմանավորված ՀՀ-ում արտակարգ իրավիակից ելնելով պարզ չեն դատական նիստերի կայացման համար նշանակված ժամկետները, հետևաբար նաև՝ ամբաստանյալի նկատմամբ վերջնական դատական ակտ կայացվելու ժամկետները:

Ըստ քրեական գործի տվյալների՝ տղամարդը 2013թ. հոկտեմբերի 16-ին Երևան քաղաքի Տիգրան Մեծի պողոտայի շենքերից մեկի մոտ իրացրել է

«Բուպրենորֆին» տեսակի թմրամիջոց պարունակող դեղահաբ։
Ընդ որում՝ թմրամիջոց իրացնելու մեղադրանքով նա գտնվել է հետախուզման մեջ ու հայտնաբերվել է Ավստրիայում, որտեղ կալանքի տակ է մնացել մոտ 3 ամիս, որից հետո նրան արտահանձնել են ՀՀ-ին:

Այսինքն՝ անգամ նախկինում փախուստի դիմած մեղադրյալի նկատմամբ դատարանը թույլատրելի է համարել գրավի կիրառումը՝ կորոնավիրուսի պատճառով։

Հեղինակ՝ Իզաբել Սահակյան

Աղբյուր` Փաստինֆո