Փաստ ինֆո

Եթե երկրի վարչապետը դժգոհ է կոռուպցիայի դեմ պայքարի արդյունքներից, դա նշանակում է, որ անկախ քրեական գործերից որոշ պաշտոնյաներ պետք է հրաժարական տան։ «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Գևորգ Պետրոսյանը։

Հիշեցնենք, որ ՀՀ վարչապետ Նիկոլ Փաշինյանը ապրիլի 6-ին ուղիղ եթերում պատասխանելով ֆեյսբուքյան օգտատերերի հարցերին հայտարարել էր, որ կոռուպցիոն գործերի քննության ընթացքից գոհ չէ։

«Վերջերս մի քանի խորհրդակցություններ ենք արել, և ես որոշ մարմինների հանձնարարականներ եմ տվել, որպեսզի հակակոռուպցիոն գործերի էֆեկտիվությունը էականորեն ավելանա։ Իհարկե, մենք փորձել ենք դուրս բերել պատճառները, և հիմա էլ այդ պրոցեսն ընթացքի մեջ է, թե որտեղ են օբյեկտիվ ու սուբյեկտիվ պատճառները, որ այդ գործերը բավարար արդյունավետությամբ առաջ չեն ընթանում։ Իմ գործընկերները գիտեն նաև, որ եթե այդ արդյունավետությունը չբարձրանա, արդեն այլ կարգի որոշումներ պետք է կայացնենք»,-ասել էր Փաշինյանը։

Վարչապետի այս հայտարարությունից հետո միմյանց են հաջորդում իրավապահ մարմինների հաղորդագրությունները՝ նախկին պաշտոնյաներին առնչվող քրեական գործեր հարուցելու, հետախուզումներ հայտարարելու մասին։ «Պատճառական կապի առկայությունը ոչ կարող եմ հերքել, ոչ հաստատել։ Ի վերջո դատախազությունը պարտավոր է գործել Սահմանադրությամբ ու օրենքով իրեն վերապահված լիազորությունների շրջանակներում, անկախ նրանից, թե վարչապետն ինչ կարծիք կհայտնի տվյալ ոլորտում արձանագրված հաջողությունների կամ անհաջողությունների մասին»։

Նա ընդգծեց՝ դատախազությունն այն մարմինը չէ, որ պետք է գործի այն ժամանակ, երբ այդ մասին խոսում է վարչապետը, այն անկախ մարմին է, ունի սահմանադրությամբ, օրենքներով իրեն վերապահված կոնկրետ, ստույգ լիազորություններ ու պարտավոր է դրանք իրականացնել։

Նշենք, որ ապրիլի 9-ին ՀՀ դատախազությունը հայտարարություն էր տարածել ու հայտնել, որ ԱԺ նախկին պատգամավոր Արթուր Գևորգյանի նկատմամբ հայտարարագրման ենթակա գույքը թաքցնելու և ապօրինի հարստանալու համար որպես մեղադրյալ ներգրավվելու որոշում է կայացվել։ Նույն օրը հայտարարվեց, որ ավարտվել է «Մուլտի գրուպ» կոնցեռնի տնօրենին առնչվող քրեական գործով նախաքննությունն ու գործն ուղարկվել է դատարան, իսկ արդեն այսօր՝ ապրիլի 10-ին, հայտնի դարձավ, որ քրեական գործ է հարուցվել ՀՀ մշակույթի նախկին նախարարի Արմեն Ամիրյանի վերաբերյալ, ինչից անգամ ինքն է անտեղյակ։

Աղբյուր` Փաստինֆո