Փաստ ինֆո

Այս պահին շատ կարևոր է գործընթացի իրականացման ձևն ու մեխանիզմները, որոնք պետք է հիմնված լինեն տնտեսական լավագույն ավանդույթների վրա: «Փաստինֆո»-ի հետ զրույցում այս մասին ասաց «Հայացք» վերլուծական կենտրոնի փորձագետ, տնտեսագետ Լիլիա Ամիրխանյանը անդրադառնալով Ucom և Beeline ընկերությունների հնարավոր միացման հարցին:

Փորձագետի կարծիքով դեռևս վաղ է այս թեմային խոր անդրադարձ կատարելու համար, քանի նախ գործընթացը կասեցված է և որպես այդպիսին զարգացումներ տեղի չեն ունենում. «Մի կողմից մենք գործ ունենք հանրության հետ, ազդակներն ուղղված են հանրությանը, և մյուս կողմից ունենք օտարերկրյա ներդրող ի դեմս Beeline-ի, հետևաբար ազդակ է լինելու նաև մեր միջազգային ներդրումային վարկանիշին: Հետևաբար այս գործընթացը պետք է լինի մաքսիմալ թափանցիկ, տնտեսական լավագույն ավանդույթների վրա հաշվի առնելով գործընկերային մշակույթը, որպեսզի կարողանանք ունենալ լավագույն արդյունքները և այս ամբողջ գործընթացից շահած դուրս գանք»,-ասաց Լիլիա Ամիրխանյանը:

Ինչ վերաբերում է կապի այս երկու օպերատորների հավանական միացումից հետո սպասվող հետևանքներին, փորձագետը նկատեց հետևանքների գնահատական կամ կանխատեսում անելը դեռ վաղ է, քանի որ տնտեսությանն ուղղված հետևանքները կարող են լինել ամենալավատեսականից մինչև ամենավատատեսական զարգացումներ. «Հետևանքները մեծապես կախված են գործընթացի իրականացման ձևից: Ուշադրության կենտրոնում պետք է լինի հենց այս պահին իրականացվող գործընթացը, որպեսզի պետության և տնտեսության համար հնարավորինս շահեկան լինի»,-հավելեց Լիլիա Ամիրխանյանը:

Դիտարկմանը ինչ հետևանք կունենա հայկական շուկա երրորդ օպերատորի մուտք գործելը, Լիլիա Ամիրխանյանն ասաց արդյունքներն ավելի շոշափելի կլինեն, երբ երրորդ օպերատորը շուկա մտնի. «Կախված է նրանից, թե ինչ տեսքով մուտք կգործի այդ օպերատորը: Այսինքն` կմտնի շարժական կապի տեսքով, համակցված կապի տեսքով, թե մեկ այլ կերպ: Երբ շուկա մուտք գործի, պայմաններն առաջարկի, ըստ այդ գնահատական կտանք»,-նշեց Լիլիա Ամիրխանյանը:

Հիշեցնենք, որ 2019 թվականի դեկտեմբերի 30-ին հայտնի դարձավ, որ Ucom-ը դիմել է դիմել է Հանրային ծառայությունները կարգավորող հանձնաժողով` «Վեոն Արմենիա» ընկերությունը գնելու նպատակով: Նշենք, որ ՏՄՊՊՀ-ն կորոնավիրուսի համաճարակով պայմանավորված կասեցրել է ընկերությունների 2019 թվականի դեկտեմբերի 30-ի դիմումի հիման վրա հարուցված վարչական վարույթի իրականացման ժամկետի ընթացքը:

Հավելենք, որ այսօր մամուլում շրջանառվում է տեղեկատվություն, որ Ucom ընկերության կառավարման խորհուրդը, ինչպես նաև տեխնիկական անձնակազմն աշխատանքից ազատման դիմում է ներկայացրել:

հեղինակ՝ Հասմիկ Կոշկարյան

Աղբյուր` Փաստինֆո