Փաստ ինֆո

ՀՀ առողջապահության նախարար Արսեն Թորոսյանը հայտնել է, որ մինչ օրս կորոնավիրուսի մոտավորապես 6500 թեստ է արվել։

«Ես օնլայն ռեժիմով հետևում եմ թեստերի թվին։ Մենք արել ենք այնքան թեստ, որքան եղել է ցուցում և հետևել ենք մեր կողմից մշակված ու միջազգային կազմակերպությունների կողմից խորհուրդ տրվող չափանիշներին։ Դրանք այսօրվանից ընդլայնվել են ու մենք ավելի շատ թեստեր կիրականացնենք՝ կապված նաև համաճարակաբանական վիճակով»,-այս մասին այսօր հրավիրված ասուլիսում ասաց Առողջապահության նախարարը։

Նա նշեց, որ ամենօրյա կատարվող թեստերի թիվը կավելանա ու նպատակ կա դրանք օրական հասցնել 1000-ի։

«Մենք հաճախ հարցեր ենք լսում, թե ինչու չկա թեստավորում այս կամ այն բուժհաստատությունում կամ բնակավայրում։ Վիրուսների թեստավորումն ամենաբարդ բժշկական հետազոտություններից մեկն է, որը բազմափուլ է, բազմամասնակցային ու բավականին երկարատև պրոցես է։ Միայն հետազոտության փուլը տևում է մոտավորապես 5 ժամ։ Լաբորատորիան պետք է համապատասխան կենսանվտանգության բարձր պահանջներին, որպեսզի վիրուսի տարածում չլինի բուժաշխատողների վրա»,-ասաց Թորոսյանն ու շեշտեց, որ Հայաստանում նման լաբորատորիաները 6-ն են և կան ևս 2 մասնավոր լաբորատորիաներ, որոնք այսօրվանից ընդգրկված են պրոցեսում։

Թորոսյանի խոսքով, վերջին մեկ ասում լաբորատորիաների աշխատակիցներն աշխատել են գրեթե 24 ժամյա ռեժիմով , ինչը կարող է սխալվելու հավանականությունը մեծացնել, դրա համար փորձելու են այնպես անել, որ այսուհետ գիշերը թեստեր չարվեն։

Նշենք, որ ներկայումս Հայաստանում կատարվում է օրական 200-300 թեստ, չնայած ապրիլի 6-ին վարչապետն ի պատասխան օգտատերերի հարցերի հայտարարել էր, որ կատարվում է 400 թեստ։

Աղբյուր` Փաստինֆո