Փաստ ինֆո

Սիսիանում ոստիկանների և քաղաքացիների միջև բախման հանգամանքները պարզելու համար Ոստիկանությունում նշանակվել է ծառայողական քննություն, իսկ ՔԿ-ում՝ հարուցվել քրեական գործ՝ խուլիգանության և պաշտոնատար անձի նկատմամբ բռնություն գործադրելու համար:

Նշենք, որ խոսքը գնում է ապրիլի 7-ի միջադեպի մասին, երբ ոստիկանները մոտեցել են քաղաքացիներին, որոնք չեն ունեցել տեղաշարժման թերթիկ, նրանց միջև բախում է տեղի ունեցել, որի հետևանքով 3 քաղաքացի է ծեծվել։

«Սիսիանում ոստիկանությունը ( մասնակից է նաև միլպետի ժամանակավոր պաշտոնակատարը) բռնություն է կիրառել քաղաքացիների նկատմամբ։ 3 քաղաքացու են ծեծել, նրանցից մեկը Սիսիանի ավագանու անդամ, մյուսը 1952 թ. ծնված քաղաքացի է։ Ծեծվածներից երկուսը հոսպիտալացվել են։ Ըստ տեղեկությունների նրանցից մեկի ծնոտը ջարդել են։

Այս օրերին տարբեր զանգեր եմ ստացել, որ նա օգտվել է հայտարարված արտակարգ դրությունից»,- ֆեյսբուքում երկու օր առաջ ահազանգել էր ԼՀԿ խմբակցության պատգամավոր Սրբուհի Գրիգորյանը։

Փաստաբան Արա Ղարագյոզյանը «Փաստինֆո»-ի հետ զրույցում ասաց, որ դաժան, անմարդկային վերաբերմունքը շարունակվում է նույնիսկ հեղափոխությունից հետո:

«Համոզված եմ, որ սա վերջին դեպքը չի լինելու, որովհետև որևէ անձ չի ենթարկվել պատասխանատվության»,- նշեց Ղարագյոզյանը:

Նրա խոսքով՝ խոշտանգման գործերով ծառայողական քննություն ընդհանրապես պետք է չիրականացվի, փոխարենը՝ ՀՔԾ-ում պետք է անհապաղ քրեական գործ հարուցվի և քրեական գործի շրջանակներում քննություն իրականացվի:

«Ոստիկանը ոստիկանի գործողության վերաբերյալ երբևէ չի կարող ծառայողական քննություն իրականացնել: Դա Եվրոպական կոնվենցիայի կողմից արգելված է: Այս պարագայում ծառայողական քննությունն անիմաստ է: Ինչպես միշտ տուժողների իրավունքները չեն վերականգնվում, այլ՝ շատ դեպքերում հայտնվում են մեղադրյալի աթոռին, ինչպես այս դեպքում՝ քրեական գործ է հարուցվել խուլիգանության և ոստիկանի նկատմամբ բռնություն գործադրելու համար: Սա, իհարկե, մտահոգիչ է: Մտահոգիչ է նաև այն, որ մինչ օրս որևէ պաշտոնյա չի դատապարտվել խոշտանգման համար, դրա համար էլ այսօր նման դեպքեր են լինում»,- ասաց Ղարագյոզյանը՝ հիշեցնելով նաև Մալաթիայի ոստիկանության բաժնում երիտասարդի նկատմամբ բռնություն գործադրելու դեպքին:

Դիտարկմանը, որ երիտասարդը հանցագործության մասին հաղորդում էր ներկայացրել և ՀՔԾ-ում հարուցվել է քրեական գործ,Ղարագյոզյանը պատասխանեց, որ, թեև քրեական գործը հարուցվել է, բայց այդ գործերը վաղ թե ուշ կարճվում են և որևէ մեկը պատասխանատվություն չի կրում:

«Եթե չեմ սխալվում, երիտասարդը կալանավորված է, իսկ ոստիկաններից որևէ մեկը պատասխանատվություն չի կրում: Արդարադատությունը պետք է ընտրովի չլինի:Եթե քաղաքացին մեղավոր է, պետք է պատասխանատվություն կրի, ինչպես և ոստիկանը՝ ոչ համաչափ ուժ կիրառելու համար»,- նշեց Ղարագյոզյանը:

Դիտարկմանը, որ քրեական գործի տվյալներով՝ քաղաքացիները խախտել են արտակարգ դրության կարգը, չեն ունեցել փաստաթղթեր և տեղաշարժման թերթիկ հրահրել են ոստիկաններին, Ղարագյոզյանը պատասխանեց, որ փաստական տվյալներին չի տիրապետում և դա քննությամբ կպարզվի:

«Ինչքան էլ հայհոյանքներ լինի, սպառնալիքներ լինի, պետք չէ քաղաքացիներին նման ձևով ծեծի ենթարկել: Տեսանք՝ տարիքով, 70 անց մարդ էր և ինչ մարմնական վնասվածքներ ուներ: Ոստիկանությունն ինչո՞վ պետք է տարբերվի, որ անհրաժեշտության դեպքում համաչափ ուժ գործադրի: Ուժ գործադրելը չի նշանակում մարդուն ծեծել, կարող է ձեռնաշղթա հագցնել, որ զսպի անձի վարքագիծը: Բայց նման ձևով ծեծելը համաչափ չեմ համարում: Փաստական հանգամանքների չեմ տիրապետում, թող քննությունը պարզի»,- նշեց Ղարագյոզյանը:

Հեղինակ՝ Իզաբել Սահակյան

Աղբյուր` Փաստինֆո