Փաստ ինֆո

ԱԺ պետաիրավական հարցերի մշտական հանձնաժողովն երկրորդ ընթերցմամբ ԱԺ լիագումար նիստերի օրակարգում ընդգրկվելու համար քննարկում է «Ձերբակալված և կալանավորված անձանց պահելու մասին» ՀՀ օրենքում լրացումներ կատարելու մասին հարցը, որի հեղինակը ԱԺ «Լուսավոր Հայաստան» խմբակցությունն է:

Նշենք, որ նախագիծը վերաբերում է ՔԿՀ-ներում գտնվող անձանց տեսակցելու պաշտոնյաների իրավունքին, որով առաջարկվում է, որպեսզի պահման վայրեր այցելելու հնարավորությունը նշելուց բացի, ամրագրվի նաեւ տեսակցելու հնարավորությունը։ Պարզվում է իրավակիրառ պրակտիկայում պատգամավորները խնդիրների են հանդիպում. հիմնարկների ղեկավարությունը թույլ է տալիս մտնել հիմնարկ, սակայն չի թույլատրում շփվել` պատճառաբանելով, որ հոդվածում միայն մուտքի ու ելքի մասին է նշված:

Հիմնական զեկուցող ԼՀԿ խմբակցության պատգամավոր Տարոն Սիմոնյանը շեշտեց, որ նախագծով երկու հոդվածում փոփոխություն է կատարվում. Առաջինը՝ 15-րդ հոդվածի 9-րդ պարբերությունն է, որը պետք է լրացվի նոր նախադասությամբ՝ «Քրեական վարույթն իրականացնող կամ այլ մարմնի որոշմամբ ձերբակալված կամ կալանավորված անձանց տեսակցությունը չի կարող արգելվել սույն օրենքի 48-րդ հոդվածի 2-րդ պարբերությամբ նախատեսված անձանց հետ, բացառությամբ եթե այդ անձինք տվյալ քրեական գործով ներգրավված են որպես դատավարության մասնակից կամ վկա: Եվ երկրորդ փոփոխությունը նախատեսվում է 48-րդ հոդվածի 2րդ պարբերությունում՝ «մուտքի» և «ելքի» բառերից հետո պետք է ավելացնել «ինչպես նաև ձերբակալվածներին պահելու վայրում ու կալանավորվածներին պահելու վայրում պահվող անձանց հետ անարգել տեսակցել»:

«Առաջին ընթերցումը բավականին բարդ անցավ ու շնորհակալություն իշխանության պատգամավորներին, որ ապահովեցին անհրաժեշտ դրական ձայները: Երկրորդ ընթերցմանն առաջարկում եմ նույն կերպ քվեարկել, ու ունեալ այն, ինչի համար երևի թե մոտ 5 տարի ընդդիմադիր պատգմավորները պայքարել են»,-ասաց Սիմոնյանը:

ԱԺ «Իմ քայլը» խմբակցության պատգամավոր Արուսյակ Ջուլհակյանն ընդգծեց, որ Տարոն Սիմոնյանն իր բոլոր հիմնավորումները կառուցում է այն անհրաժեշտության շուրջ, որ ԱԺ պատգամավորը պետք է հնարավորություն ունենա տեսակցել ձերբակալված կամ կալանավորված անձանց. «Քանի որ Ձեր առաջարկում կոնկրետ հոդվածին հղում եք անում, որը շատ ավելի լայն սպեկտրի պաշտոնյաներին է հնարավորություն տալիս տեսակցել ձերբակալված ու կալանավորված անձանց, կխնդրեի նաև այդ մասով հիմնավորել, թե որքանով է արդարացված նրանցից յուրաքանչյուրին տեսակցելու հնարավորություն տալը»:

Պատասխանելով Ջուլհակյանի հարցին, Սիմոնյանն ասաց. «Օրենսդրի կամքն է եղել, որ այդ բոլոր անձանց միևնույն մակարդակում դիտարկենք: Մեզ համար սա առաջնային նշանակություն ունի պատգամավորների մասով , քանի որ պրակտիկայում հենց այստեղ է առաջացել խնդիրը»:
«Իմ քայլը» խմբակցությունից մեկ այլ պատգամավոր Սուրեն Գրիգորյանն էլ հետաքրքրվեց, թե արդյոք նախկինում Նիկոլ Փաշինյանի ու այլ պատգամավորների հեղինակած նախագիծն իր կոնցեպտով ու նպատակով նույնն է, ինչ Սիմոնյանը հիմա է ներկայացնում:

«Նպատակի և այն իմաստով բովանդակության կոնտեքստում այս նախագծերը նույնական են և դրա համար բավական է «Ելք» խմբակցության ժամանակ ներկայացված նախագծի հիմնավորումը կարդալ, սակայն բառերի շարադասության իմաստով տարբերություն կա»,-ասաց Սիմոնյանը:

Պետաիրավական հարցերի մշտական հանձնաժողովի նախագահ Վլադիմիր Վարդանյանը Տարոն Սիմոնյանին դիմեց որպես ԵՊՀ դասախոսի ու ԱԺ պատգամավորի ու հարցրեց, թե այս նախագծով ում և որ իրավունքն է պաշտպանվում, նախաձեռնությունն ինչով է օգտակար կալանավորված կամ ձերբակալված անձի համար:

«Եթե մենք այս հարցը քննարկեինք 2018թ-ից առաջ, բոլորիս համար ակնհայտ կլիներ, թե այս նախաձեռնությունն ինչ շահ է դիտարկում, որովհետև հնարավոր էին դեպքեր, երբ անձինք ձերբակալվեին, կալանավորվեին որոշակի քաղաքական դրդապատճառներից ելնելով եւ պետք լիներ տեսակցել, իմանալ, թե ոնց են, ինչ իրավունքներ են խախտվում և այլն: Հիմա ինչ-որ առումով հանգիստ ենք, քանի որ ենթադրվում է՝ ժողովրդական հեղափոխությունից հետո նման դեպքեր չեն լինի, բայց որպես օրենսդիր մենք հնարավոր բոլոր անցքերը պետք է փակենք, որ ինչպիսին էլ լինի իշխանությունը որևէ պարագայում չխաթարվի պատգամավորների՝ ձերբակալվածներին, կալանավորվածներին տեսակցելու իրավունքը և նաև նրանց իրավունքը իրենց ընտրած ներկայացուցիչների հետ հանդիպելու ու մտահոգությունները հայտնելու»,-ասաց Սիմոնյանը:

«Իմ քայլից» Վահագն Հովակիմյանը հետաքրքրվեց, թե որն է շահագրգռվածությունը, որ կալանավորը կամ ձերբակալվածը պատգամավորի հետ հանդիպեն գաղտնիության պայմաններում:  Սիմոնյանը բացատրեց, որ շարժառիթը տվյալ անձի հետ անկաշկանդ շփումն է, որպեսզի պատգամավորը որպես ժողովրդի ընտրյալ կարողանա հասկանալ խնդիրները:

«Ձեր հարցերի հետ կապված ցանկանում եմ նաև հռետորական հարցեր տալ, Դուք գլխով կարող եք այո կամ ոչ ասել, որպեսզի ստացվի մեր երկխոսությունը: Դուք վստա՞հ եք, որ ձեր իշխանությունը հավերժ մնալու է, ենթադրվում է որ մի օր փոխվելու է չէ՞ ձեր իշխանությունը: Եթե դուք վստահ չեք, որ կատարյալ բարի իշխանությունից հետո չի գալու նորից կատարյալ բարի իշխանություն և կարող է ձախողումներ ունեցող իշխանություն գա, ով կանտեսի իրավունքի դրույթները, ապա պետք է հասկանանք, որ մենք պետք է հնարավոր գործիքակազմով սահմանափակենք իշխանության հնարավորությունը սահմանափակելու պատգամավորի իրավունքը կոնկրետ ձերբակալված կամ կալանավորված անձին տեսնելու առումով: Դուք գալիս եք այն կանխավարկածից, որ այս իշխանությունը լավն է, ապագայինն էլ է լավը լինելու, եթե անգամ այն կանխավարկածից գանք, որ այս իշխանությունը լավն է, ապագայի համար պետք է գանք այն կանխավարկածից, որ  հնարավոր է վատ իշխանություն գա»,-ասաց ԼՀԿ պատգամավորը:

Հանձնաժողովի նախագահ Վլադիմիր Վարդանյանը կատակեց. «Ինձ թվում է այլևս հարցեր չկան, իսկ եթե կան, ապա հարցերի համար հատկացված ժամանակը սպառվել է»:

Աղբյուր` Փաստինֆո