Փաստ ինֆո

«Հրապարակ» թերթը գրում է. «Մինչ առաջին նախագահն իշխանության ընդդիմախոսներին սաստում է՝ հորդորելով չքննադատել, երկիրը պատերազմական վիճակում է, իշխանությունը շարունակում է իր պատերազմը Սահմանադրական դատարանի նկատմամբ:

«Իմ քայլի» պատգամավոր Վահագն Հովակիմյանը շրջանառության մեջ է դրել մի նախագիծ, որով առաջարկում է փոխել «ԱԺ կանոնակարգ» սահմանադրական օրենքի 141-րդ հոդվածը: Գործող օրենքով՝ Սահմանադրական դատարանի դատավորի ընտրության հարցը քննարկվում է թեկնածուի առաջադրումից հետո՝ ԱԺ հերթական նիստում:

Պատգամավորն առաջարկում է օրենքի «հերթական» բառը փոխարինել «առաջիկա» բառով եւ այդպիսով ՍԴ դատավորի ընտրության հարցը քննարկել նաեւ արտահերթ նիստում: Այսպիսով՝ իշխանությունը ՍԴ-ին, ի դեմս նախագահի, սպառնում է, որ իրենց հարցը դեռ օրակարգում է, եւ ամեն ինչ անում են սեղմ ժամկետներում հարցը լուծելու համար, արտակարգ դրության ավարտից հետո հանրաքվեն, ըստ ամենայնի, տեղի կունենա հունիսի վերջ-հուլիսի սկզբներին, ու չի բացառվում, որ ԱԺ-ն ամառային արձակուրդի մեկնի:

Նախագիծն ընդգրկված է ԱԺ պետաիրավական հարցերի մշտական հանձնաժողովի այսօրվա նիստի օրակարգում, ապա եւ  կներկայացվի եկող շաբաթ մեկնարկելիք հերթական քառօրյայում»:

Հոդվածն ամբողջությամբ կարող եք կարդալ «Հրապարակ» թերթի՝ 09.04.20թ. համարում։

Աղբյուր` Փաստինֆո