Փաստ ինֆո

ԱԺ պետաիրավական հարցերի մշտական հանձնաժողովը հավանություն է տվել ՀՀ քրեական օրենսգրքում և ՀՀ քրեական դատավարության օրենսգրքում լրացում կատարելու մասին կառավարության ներկայացրած օրենքների նախագծերի փաթեթին:

Հիմնական զեկուցող, արդարադատության նախարարի տեղակալ Սրբուհի Գալյանի փոխանցմամբ` նախագծով առաջարկվում է քրեականացնել բռնության կոչերը, բռնությունն արդարացնելը, բռնության քարոզը:

«Առաջին ընթերցման ժամանակ բուռն քննարկումներ տեղի ունեցան և հիմնականում շեշտադրվում էր այն հանգամանքը, որ արվեստի, մշակույթի գործերում բռնության նմանվող արտահայտությունները գուցե դիտարկվեն բռնության կոչ: Ես կցանկանամ մի առաջարկով հանդես գալ, որի համաձայն առաջարկում եմ նախագծի հիմնավորման շրջանակներում ուղղակիորեն նշել, որ նմանատիպ դեպքերը չպետք է մեկնաբանվեն այս հանցակազմի համատեքստում»,-ասաց Գալյանը:

ԱԺ «Իմ քայլը» խմբակցության պատգամավոր Նիկոլայ Բաղդասարյանը հետաքրքրվեց, որ եթե օրինակ X անձը բարկացած է պատգամավորների վրա և հայտարարում է, որ բոլոր պատգամավորներին պետք է սպանել, տվյալ դեպքում հանցակազմ կա՞, թե՞ ոչ:

«Ձեր բերած օրինակում, այո, փաստացի, առերևույթ բռնության կոչն առկա է որպես հանցակազմ, բայց միևնույն ժամանակ պետք է գնահատվի դրա իրական, հասանելի լինելը, անձի դիտավորությունն իր կոչի արդյունքում բռնության ենթարկված տեսնել որոշակի կատեգորիայի անձանց, պետք է նաև գնահատվի անձի դերը, դիրքը հասարակության մեջ: Այս ամենը պետք է գնահատվի գործի քննության ընթացքում: Չեմ բացառում հնարավորությունը, որ Ձեր բերած օրինակում գործն ընթացք ստանա, սակայն, կարծում եմ, որ մեղադրանք չի առաջադրվի»,-ասաց Սրբուհի Գալյանը:

Բաղդասարյանը հարցրեց, արդյոք բացառվում է տարբերակը, որ այս արարքը դիտարկվի ոչ թե քրեական օրենսգրքով, այլ վարչական իրավախախտումների մասին օրենսգրքով ու սահմանվի բարձր տուգանք. «ես չեմ կարծում, որ մենք շահած կլինենք, եթե նման երևույթները սկսենք քրեականացնել, քանի որ ողջամտորեն հարց է ծագում, թե ինչու վիրավորանքը չի քրեականացվում: Որոշ դեպքերում վիրավորանքը կարող է ավելի ծանր հետևանք առաջացնել»:

Գալյանն ընդգծեց՝ արարքի հանրային վտանգավորությունն այնպիսի է, որ բավարարում է այն քրեական օրենսգրքում զետեղելու համար. «Եթե նայեք հոդվածի սանկցիան, ապա այն նախատեսում է որպես ոչ մեծ ծանրության հանցագործություն, նույնիսկ առաջին մասով ազատազրկումից բացի այլ պատժատեսակի հնարավորություն կա»:

Նախարարի տեղակալն ընդգծեց՝ բռնության կոչը պետք է որոշակի նպատակ ունենա ու պայմանավորված լինի անձի կոնկրետ հատկանիշով՝ սոցիալական ծագումով, ազգությամբ և այլն:
Տևական ժամանակ քննարկումներից հետո հանձնաժողովն առաջարկեց հարցի քննարկումը հետաձգել, սակայն Գալյանը նշեց, որ նախարարությունը վարչապետի կողմից հանձնարարական ունի և դրա կատարումն այդ դեպքում կուշանա:

Նախագծի քվեարկությանը ներկա էին 5 պատգամավոր, որոնք բոլորն էլ «Իմ քայլը» խմբակցությունից էին: Քվեարկության արդյունքում նախագիծն ընդունվեց միաձայն:

Աղբյուր` Փաստինֆո