Փաստ ինֆո

Այս պահի դրությամբ կառավարության նախաձեռնած հակաճգնաժամային միջոցառումների շրջանակում արդեն բաշխվել է 3 մլրդ 670 մլն դրամ: Այս մասին կառավարության այսօրվա նիստի մեկնարկին ասաց ՀՀ վարչապետ Նիկոլ Փաշինյանը:

Վերջինս նկատեց այս թիվը կառավարության նախատեսածի 10 տոկոսից էլ պակաս է. «Կառավարությունն արդեն իսկ հրապարակել է այն էլեկտրոնային պատուհանը, որով քաղաքացիները կարող են ստուգել արդյոք իրենք տվյալ ծրագրերի շահառու են, թե ոչ: Այս օրերին բազմաթիվ շահառուներ իրենց անունները չեն գտել, բայց ուզում եմ ասել, որ ամենօրյա ռեժիմով տվյալները թարմացվում են: Բազան ամենաուշը հաջորդ շաբաթվա սկզբին կամբողջանա և ամբողջ օգնությունները և աջակցության փաթեթները հասանելի կլինեն բոլոր քաղաքացիներին, ովքեր ծրագրերի շահառու են հանդիսանում»,-ասաց վարչապետը:

Նրա խոսքով այսօրվա դրությամբ ՀՀ բանկերը շուրջ 290 հազար քաղաքացիների վարկային արձակուրդ են տվել 9,3 մլրդ դրամի չափով: Վարկային արձակուրդ է տրվել նաև 5300 իրավաբանական անձանց 15,4 մլրդ դրամի չափով: Վարչապետը վստահեցրեց, որ այս գործընթացը կշարունակվի:

«Այսօր դաշտում բազմաթիվ են առաջարկները, թե ինչ պետք է անի կառավարությունը և երբեմն այդ առաջարկությունենրի հեղեղից գլխապտույտ կարելի է ստանալ: Մենք բավական երկար ժամանակ ամենօրյա ռեժիմով աշխատում ենք: Կառավարությունը հստակ ռազմավարություն ունի, թե ինչպես է հաղթահարելու ճգնաժամը: Իհարկե մենք կլսենք բոլորին, հաշվի կառնենք առաջարկներ, բայց մեր քայլերը տեղավորվելու են մեր ռազմավարության մեջ»,-նշեց Նիկոլ Փաշինյանը` ընդգծելով, որ հստակ քայլերով առաջ են գնալու և շարունակելու են հակաճգնաժամային միջոցառումների ընդունումը:

Աղբյուր` Փաստինֆո