Փաստ ինֆո

ԱԺ «Լուսավոր Հայաստան» խմբակցությունն այսօրվա նիստում «Քաղաքացիական օրենսգրքում» լրացումներ կատարելու վերաբերյալ արդեն երրորդ օրենքի նախագիծն է ներկայացնում: Նախորդ երկու նախագծերին հանձնաժողովը դեմ էր քվեարկել, այդ իսկ պատճառով հիմնական զեկուցող Տարոն Սիմոնյանն իր զեկույցը սկսեց հարցով «Ուզու՞մ եք չզեկուցեմ, միանգամից դեմ քվեարկեք»:

Ներկայացնելով նախագիծը՝ նա ասաց, որ առաջարկվող այս փոփոխությունը պայմանավորված է Ընտանեկան օրենսդրության իրավակարգավորումներով:

«Քաղաքացիական օրենսգրքի 24-րդ հոդվածը սահմանում է գործունակության հիմքերը, և ինչպես նախորդ դեպքերում, այս դեպքերում էլ հիմքում գիտական համայնքի հետ քննարկումներն են: Պարզվել է, որ «Ընտանեկան օրենսգրքի» հետ որոշակի անհամապատասխանություն կա, քանի որ դրա 10-րդ հոդվածով սահմանվում է ամուսնության ավելի ցածր տարիքի հնարավորություն և նշվում է, որ եթե ամուսնացած է անձը, ապա գործունակություն է ձեռք բերում:

«Քաղաքացիական օրենսգրքում» գործունակության վերաբերյալ ընդհանուր և հատուկ կարգ կա, սակայն մի կարգավորում կա, որ բաց է մնացել»,-ասաց Սիմոնյանը՝ նշելով, որ հատուկ կարգերում նշված չեն այն անչափահասները, ում ամուսնությունը չի գրանցվել, բայց նրանք երեխա են ունեցել:

«Իհարկե, հասկանալի է, որ նման դեպքերը ցանկալի չեն, բայց, ամեն դեպքում, մենք գործ ունենք փաստերի հետ և քանի որ ընտանեկան օրենսդրությունը երեխա ունեցող ծնողներին հնարավորություն է տալիս գործարքների մասնակցել և այլն, հակասություն է առաջանում, որ եթե գործունակ չէ անձը, ապա չի կարող գործարքների մասնակցել, ու իրավիճակներ կարող են լինել, որ օրինակ 16 տարեկան ծնողն ունենա երեխա, բայց գրանցված ամուսնության մեջ չլինի և հնարավորություն չունենա երեխայի լավագույն շահից ելնելով գործարքների մասնակցել»,-շեշտեց ԼՀԿ պատգամավորը:
Սիմոնյանը հայտնեց, որ այս տրամաբանությունից ելնելով «Քաղաքացիական օրենսգրքի» 24-րդ հոդվածում առաջարկվում է ավելացնել 4-րդ մասը, որը մեկ այլ հատուկ պայման է սահմանում հետևյալ բովանդակությամբ՝ «Անչափահաս ծնողները լրիվ ծավալով գործունակություն են ձեռք բերում ամուսնական տարիքին հասնելու պահից»:

ԱԺ «Իմ քայլը» խմբակցության պատգամավոր Արուսյակ Ջուլհակյանը խնդրեց հստակեցնել, թե այս դեպքում որն է լինելու ամուսնական տարիքը, եթե ծնողներից մեկը 16 տարեկան է, իսկ մյուսը պարզ չէ 18 է թե ոչ:

«Բոլոր դեպքերում, քանի որ ամուսնական նվազագույն տարիքը 16-ն է սահմանված, այդ կանխավարկածով ենք առաջնորդվել»,-պարզաբանեց Տարոն Սիմոնյանը:

Արդարադատության փոխնախարար Վահե Դանիելյանն էլ ասաց, որ Կառավարությունը գտնում է՝ « «Ընտանեկան օրենսգրքի» և «Քաղաքացիական օրենսգրքի» հոդվածներում հակասություն չկա. «Ընտանեկան օրենսգրքի 50-րդ հոդվածն ասում է, որ ամուսնության մեջ չգտնվող անչափահաս ծնողները ամուսնության տարիքը լրանալուց հետո կարող են ինքնուրույն իրականացնել ծնողական իրավունքները:Այստեղ պետք է հասկանալ, թե որն է ամուսնության տարիքը, «Ընտանեկան օրենսգիրքը» սահմանում է, որ դա 18 տարեկանն է, գործունակության ձեռք բերումը ևս 18 տարեկանն է և այս ձևակերպումներով որևէ նոր բան չի առաջարկվում»:

Տարոն Սիմոնյանը շեշտեց, որ նախագծում գրված է «անչափահաս ծնողներ» և 18 տարեկանը լրացած անձն անչափահաս չէ, հետևաբար խոսքը 18 տարեկանը չլրացած անչափահաս ծնողների մասին է:

«Դուք, իհարկե, կարող եք ասել, որ ծնողական իրավունքները երեխային սիրելու և նրա նկատմամբ պարտավորությունները տան ներսում կատարելով կարող ենք սահմանափակել, բայց ոչ, ծնողական իրավունքների իրականացումը թե՛ «Ընտանեկան օրենսգրքի» տրամաբանությամբ և թե՛ ընդհանրապես օրենսդրության տրամաբանությամբ վերաբերում է նաև գործարքներ կնքելուն, ինչն անհնար կլինի, եթե անձը գործունակություն ձեռք չբերի»,-ասաց ԼՀԿ պատգամավորը:

Հանձնաժողովը 2 կողմ, 3 դեմ և 3 ձեռնպահ ձայներով չընդունեց նախագիծը:

Աղբյուր` Փաստինֆո