Փաստ ինֆո

Ռազմարդյունաբերության համալիրն իր ամբողջ հզորությամբ ու թափով աշխատում է, պարետի որոշմամբ, դա բացառության մեջ մտնող տնտեսական ոլորտներից է, և գործարաններն իրենց պատվերների շրջանակում շարունակում են իրականացնել աշխատանքները։ Այս մասին այսօր հրավիրված ասուլիսում ասաց Բարձր տեխնոլոգիական արդյունաբերության նախարար Հակոբ Արշակյանը։

Նա հայտնեց, որ աշխատանքներն ակտիվ փուլում են և Պաշտպանության նախարարության հետ բազմաթիվ պայմանագրեր են ստորագրվել։
Արշակյանի խոսքով, նախարարությունը տեխնոլոգիական ընկերությունների հետ պարբերաբար քննարկումներ է իրականացնում , որպեսզի հասկանան, թե ինչ խնդիրների են բախվում այս ընկերությունները և պետությունն ինչպիսի գործիքներ կարող է կիրառել, որպեսզի երկարաժամկետ զարգացման կոնկրետ ծրագրեր լինեն։

«Մեր դրամաշնորհային ծրագրերը շարունակական բնույթ են կրելու։ Այն ընկերությունները, որոնք որոշակի դժվարություններ ունեն այսօր ստեղծված շուկայական իրավիճակի հետ կապված, նրանց համար սա լավ հնարավորություն է, որպեսզի մասնակցեն դրամաշնորհային ծրագրերին»,-ասաց նախարարը։

Անդրադառնալով կորոնավիրուսի հետևանքները զսպող, սոցիալական բնույթ կրող գաղափարների լուծումների մասին նախարարության հայտարարած մրցույթին՝ Արշակյանն ասաց, որ դրա վերջնաժամկետն ավարտվել է, ստացվել են 133 հայտ, որոնցից 37-ը գաղափարի փուլում է, 59-ը՝ մշակման, ևս 37-ը՝ կիրառման, այսինքն՝ կարելի է մոդիֆիկացնել ու կիրառել։

«Այդ հավելվածներն ու լուծումները հիմնականում մեկուսացման մեջ գտնվող մարդկանց տեղաշարժի վերահսկողության, ծերերի և խոցելի խմբերի խնամքի ու օգնության, սարքավորումների, պաշտպանիչ սարքերի տվյալների գրանցման և այլ ուղղություններով են, նաև արհեստական բանականության, մեքենայական ուսուցման և վիրտուալ իրականության կիրառման նոր լուծումներով։ Ունենք նաև որոշակի առաջարկներ առևտրի հարթակների և առցանց հավելվածների մասով։ Գնահատականները կտրվեն անկախ հանձնաժողովի կողմից, այսօր կամ վաղը հաղթողները կհանրայնացվեն»,-ասաց նա։

Աղբյուր` Փաստինֆո