Փաստ ինֆո

Առողջապահության նախարարությունում չկա թափանցիկ մի հաշվետվություն, թե հանրապետությունում քանի թեստ ունենք և ինչ թեստեր են դրանք: «Փաստինֆո»-ի հետ զրույցում այս մասին ասաց «Պարասելսուս» ՀԿ նախագահ Նունե Ներսիսյանը:

Վերջինս, պատասխանելով հարցին արդյոք կարող ենք խոսել կորոնավիրուսի պիկն անցնելու մասին, թե ոչ, նկատեց. «Առողջապահության նախարարության կողմից չկա որևէ հաշվետվություն, թե քանի թեստ ունենք, արդյոք իրապես այդքան թեստավորում արվում է, թե ոչ, որ թեստերով են արդյունքներն արձանագրվում ռապիդով, թե ՊՇՌ-ով: Այդ հաշվետվության առկայության պարագայում կարող էինք խոսել մեզ մոտ դեպքերը պակասում են կամ ինչ-որ պիկն անցել ենք, թե ոչ»,-ասաց Նունե Ներսիսյանը նկատելով, որ խնդիրը նաև թեստերի որակի մեջ է: Մասնագետի խոսքով ռապիդ թեստերն արդյունքները հակամարմիններով են ցույց տալիս և հաճախ սխալ պատասխաններ են լինում:

«Ասում են իբրև պիկից դուրս ենք եկել, բայց երբ նայում ենք Առողջապահության նախարարության կողմից հրապարակվող կորին, այն դեռ աճում է: Այդ դեպքում ինչպես հասկանանք ինչի մասին է խոսքը, քանի դեռ չունենանք հստակ պատասխան, թե քանի թեստ ունենք, որ թեստերով են հետազոտվում: Տարբեր մարզերից տվյալներ ունեմ, կոնկրետ Շիրակի մարզում թոքաբորբով հիվանդ մարդ կա, ով մի քանի օր է դիմում է հիվանդանոց, բայց ասել են տեղ չունեն: Երեկ մի կերպ ընդունվել է ինֆեկցիոն հիվանդանոց, այսօր նոր թեստավորվել է: Եթե նրա մոտ կորոնավիրուս հայտնաբերվի, պատկերացնում եք շփվել է իր ընտանիքի անդամների հետ, այլ մարդկանց հետ»,-ասաց Նունե Ներսիսյանը:

Հասարակական կազմակերպության նախագահը նկատեց նույնիսկ այս պահի դրությամբ քաղաքում և առհասարակ ՀՀ տարածքում խստացումներ չի տեսնում. «Սուպերմարկետներ եմ մտնում, որտեղ տեսնում եմ ո'չ սոցիալական հեռավորություն է պահպանվում, ո'չ քաղաքի բարձրահարկ շենքերի մուտքերը, ճաղավանդակներն են ախտահանվում: Գործառույթները կիսատ են արվում»,-ընդգծեց Նունե Ներսիսյանը:

Նշենք, որ այսօր ՀՀ վարչապետ Նիկոլ Փաշինյանը ֆեյսբուքյան էջում գրել էր, որ եթե այս վիճակագրությունը շարունակվի, կնշանակի կորոնավիրուսի պիկը հաղթահարել ենք և այդ պիկը եղել է մարտի 31-ին, ապրիլի 1-ի:

Հեղինակ՝ Հասմիկ Կոշկարյան

Աղբյուր` Փաստինֆո