Փաստ ինֆո

ՀՀ երկրորդ նախագահ Ռոբերտ Քոչարյանը պետք է անհապաղ ազատ արձակվի կալանքից՝ հաշվի առնելով մի շարք հանգամանքներ: Այս մասին հրավիրված ասուլիսին ասել է ՀՀ երկրորդ նախագահ Ռոբերտ Քոչարյանի պաշտպանական խմբի անդամ Արամ Վարդևանանը:

Փաստաբանը տեղեկացրեց, որ դիմել է ԲԴԽ նախագահին և երկու անդամ՝ ՄԻՊ-ին: Նրա խոսքով՝ ՄԻՊ-ից ստացել է պատասխան, որի համաձայն ներկայացված խնդիրը՝ դատավորի բացակայությունը, մարդու իրավունքների խախտում է: Նրա խոսքով՝ խափանման միջոցի վերաբերյալ միջնորդությունը պետք է քննվի անհապաղ:

«Երբ կալանավորման միջնորդություններ են ներկայացվում, շատ արագ են քննվում: Դուք տեսել եք կամ պատկերացնու՞մ եք կալանավորման միջնորդություն, որ ներկայացվի մարտի 16-ին և գտնվենք ապրիլի 8-ին, բայց այն քննված չլինի: Պատճառն էլ այն լինի, որ դատավորը մարտի 13-ից բացակայում է և չգիտեն, թե երբ է վերադառնալու: Պարզ է՝ նման դեպք դուք չեք էլ կարող պատկերացնել, որովհետև այդպես չի լինի: Այդ նույն տրամաբանությունը պետք է լինի անձնական երաշխավորության, գրավի պայմաններում, բայց Ռոբերտ Քոչարյանի դեպքում տեսնում ենք ճիշտ հակառակ պատկերը»,- նշեց Վարդևանյանը:

Նա նաև հիշեցրեց ԵԽ հանձնարարականը, որի համաձայն՝ խոցելի խմբերում գտնվող անձանց նկատմամբ հորդորում են կիրառել այլընտրանքային խափանման միջոցներ:

«Կան դատավորներ, որոնք ոչ թե սպասել են փաստաբանի միջնորդությանը, այլ՝ սեփական նախաձեռնությամբ վերանայել են կալանքը, հիմքը դիտարկել են ԵԽ Խոշտանգումների կանխարգելման կոմիտեի զեկույց-սկզբունքները: Այս պայմաններում, երբ ունենք կորոնավիրուսային վարակ, երբ ունենք նման վտանգավոր իրավիճակ, ունենք «Վարդաշեն» ՔԿՀ ՔԿ ծառայողների վարակման դեպք՝ հաստատված»,- ասաց Վարդևանյանը՝հիշեցնելով ԵԽ մարդու իրավունքների հանձնակատար Դունյա Միյատովիչը կոչը՝ վերայանել կալանավորման ինստիտուտը խոցելի խմբում գտնվող անձանց նկատմամբ:

Վարդևանյանն ընդգծեց, որ Միյատովիչը հստակ նշել է, որ դա պետք է արվի առանց խտրականության: Անդրադառնալով՝ դատախազության նախաձեռնությանը, որի համաձայն կփոփոխվեն անազատության մեջ գտնվող անձանց խափանման միջոցները, Վարդևանյանն ասաց, որ պարտադիր կերպով դա պետք է վերաբերի նաև Ռոբերտ Քոչարյանին:

«Այս պայմաններում, եթե մենք կրկին ականատես լինենք երկակի ստանդարտներին, հավատացեք՝դատախազության բարի նախաձեռնությունը կլինի հերթական կոպտագույն խախտումը »,- ասաց Վարդևանյանը՝ հավելելով, որ արդեն 8 օր է, ինչ դատավոր Աննա Դանիբեկյանի աշխատակազմից հեռախոսազանգերին չեն պատասխանում, բացի այդ՝ Երևան քաղաքի դատարանի նախագահի աշխատակազմից հայտնում են, որ վերջինս զրուցել է դատավոր Աննա Դանիբեկյանի հետ և չեն կարողանում ասել, թե երբ կվերադառնա:

«Ոչ թե, որովհետև մեզ չեն ուզում ասել, որովհետև իրենք էլ չգիտեն: Մի բան կարող եմ ասել, որ, եթե դատավորը նման կերպ է վերաբերվում իր վարույթում գտնվող քրեական գործին, երբ փաստացի ունի կալանավորված անձ, որի պատասխանատվությունը՝ բոլոր հնարավոր ռիսկերի կրում է դատավորը, սա դատավորի պատվից, կարգավիճակից չի բխում»,- ասաց Վարդևանյանը:

Անդրադառնալով հետագա քայլերի մասին՝ փաստաբան Հայկ Ալումյանը նշեց, որ նոր բողոք է ուղարկել ՄԻԵԴ, պարբերաբար տեղեկություն է փոխանցվում դատական գործընթացի ընթացքի և նախկին նախագահի իրավունքների պաշտպանության հետ կապված, իսկ փաստաբան Արամ Վարդևանյանը կապի մեջ է ՄԻՊ-ի հետ:

Վարդևանյանը հիշեցրեց, որ ավելի քան 5 ամիս է՝ չի դիտարկվել խափանման միջոցի փոփոխության հարցը՝ չնայած նրան, որ ինչպես եվրոպական, այնպես էլ՝ հայրենական օրենսդրությունը պահանջում են պարբերաբար դիտարկել այդ հարցը:

«Մարդու իրավունքների՝ մասշտաբային առումով աննախադեպ խախտում է տեղի ունենում: Թղթի վրա դատավոր կա, սակայն փաստացի չկա»,- ասաց Վարդևանյանը:

Աղբյուր` Փաստինֆո