Փաստ ինֆո

«5-րդ ալիք» ՀԸ սեփականատեր Արմեն Թավադյանի և Վարուժան Մկրտչյանի քրեական գործով առաջին դատական նիստը նշանակվել է ապրիլի 15-ին՝ ժամը 11:30-ին: Այս մասին «Փաստինֆո»-ն տեղեկացավ Դատական տեղեկատվական համակարգից:

Հիշեցնենք, որ Արմեն Թավադյանը մեղադրվում է «Մարտի 1»-ի գործով տուժողներից մեկին ենթադրաբար կաշառելու համար, որ դատարանում սուտ ցուցմունք տա։ Նրա դեմ ցուցմունք է տվել Ռ.Քոչարյանի մեկ այլ ենթադրյալ աջակից՝ Վ.Մկրտչյանը, որը նախ ձերբակալվել էր, ապա ազատ արձակվել։

Ա.Թավադյանը չի ընդունում առաջադրված մեղադրանքը, իսկ ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը, հայտարարել է, որ տուժողներին կաշառելու անհրաժեշտություն չկա եւ չի եղել, քանի որ քրեական գործում չկա Ռ.Քոչարյանի դեմ որեւէ ցուցմունք, որը փոխելու կարիք լինի։

Արմեն Թադայանն ավելի քան երկու ամիս գտնվել է նախնական կալանքի տակ եւ միայն վերաքննիչ քրեական դատարանը՝ Ալեքսանդր Ազարյանի նախագահությամբ, մարտի 11-ին վերացրեց նրա նկատմամբ որպես խափանման միջոց ընտրված կալանավորումը՝ արձանագրելով, որ բացակայում է հիմնավոր կասկածը։

Մարտի 16-ին դատախազությունը հայտարարեց, որ հաստատել է մեղադրական եզրակացությունը և գործն ուղարկել դատարան, որը դատարան մուտք է եղել մարտի 18-ին և նույն օրը մակագրվել Երևանի ընդհանուր իրավասության դատարանի նախագահ Արթուր Մկրտչյանին:

«Փաստինֆո»-ի հաղորդմամբ՝ դատավոր Արթուր Մկրտչյանը, ում մակագրվել է քրեական գործը, նախկինում երկար տարիներ աշխատել է դատախազությունում, եղել է Լոռու մարզի դատախազը։ Բացի այդ՝ Արթուր Մկրտչյանը հանրությանը հայտնի է ՀՀ երկրորդ նախագահ Ռոբերտ Քոչարյանի կալանքը երկարացնելու որոշմամբ: 2019թ. հունվարի 18-ին նա բավարարել է ՀՔԾ քննիչի միջնորդությունը՝ Ռոբերտ Քոչարյանի կալանքը ևս երկու ամսով երկարացնելու մասին և մերժել է պաշտպանների գրավի միջնորդությունը:

Հեղինակ՝ Իզաբել Սահակյան

Աղբյուր` Փաստինֆո