Փաստ ինֆո

Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, կալանքից ազատ է արձակել փաստաթղթերի կեղծման և ՀՀ սահմանն ապօրինի հատելու մեջ մեղադրվող Թուրքիայի Հանրապետության քաղաքացուն: Այս մասին «Փաստինֆո»-ն տեղեկացավ պաշտպան Լյուդվիգ Ավետիսյանից:

Պաշտպանը միջնորդություն էր ներկայացրել դատարան՝ խնդրելով իր պաշտպանյալի նկատմամբ ընտրված խափանման միջոց կալանավորումը փոխարինել ստորագրությամբ՝ չհեռանալու մասին, ինչը դատարանը բավարարել է: Դատարանը որոշում կայացնելիս հաշվի առել ԵԽ՝ Խոշտանգումների և անմարդկային կամ արժանապատվությունը նվաստացնող վերաբերմունքի կամ պատժի կանխարգելման եվրոպական կոմիտեի՝ մարտի 20-ին հրապարակված զեկույց- հանձնարարականը, որի համաձայն պետք է վերանայվեն անազատության մեջ գտնվող անձանց խափանման միջոցները՝ կորոնավիրուսի համավարակով ստեղծված իրավիճակով պայմանավորված:

«Նկատի ունենալով, որ նրան մեղսագրված է ոչ մեծ ծանրության և միջին ծանրության հանցագործություններ, որ մեծ է կորոնավիրուսով վարակվելու և այլոց վարակելու վտանգն՝ ազատ արձակեց »,- նշեց Ավետիսյանը՝ ավելացնելով, որ իր պաշտպանյալն արդեն ազատ է արձակվել «Արմավիր» ՔԿՀ-ից: Պաշտպանը նշեց, որ իր պաշտպանյալն այստեղ որևէ հարազատ չունի, այդ պատճառով էլ ինքն է գնացել «Արմավիր» ՔԿՀ և նրան բերել Երևան՝ ծանոթների մոտ: Բացի այդ՝ մեղադրյալը, թեև Թուրքիայի Հանրապետության քաղաքացի է, ազգությամբ հայ է՝ Թուրքիայի ծպտյալ հայերից:

Նշենք, որ վերջինս մեղադրվում է կեղծ փաստաթղթերով ՀՀ պետական սահմանը հատելու մեջ: «Միգրացիոն ծառայությանը դիմելու ժամանակ ոստիկանությունը կալանավորել է, հիմա էլ՝ ապաստանի կարգավիճակ են տվել»,- նշեց փաստաբանը:

Հեղինակ՝ Իզաբել Սահակյան

Աղբյուր` Փաստինֆո