Փաստ ինֆո

ՀՀ երկրորդ նախագահ Ռոբերտ Քոչարյանի փաստաբանները կասկածահարույց են համարում այն իրողությունը, որ դատավոր Աննա Դանիբեկյանը դեռևս մարտի 13-ից անաշխատունակ վիճակում է եղել, բայց նրա աշխատակազմից ընդհուպ մարտի 16-ին հավաստիացրել են, որ մարտի 17-ի դատական նիստն անպայման տեղի է ունենալու: Այս մասին հրավիրված ասուլիսին ասել է ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:

Նրա խոսքով՝ մարտի 16-ին միջնորդություն է ներկայացրել դատարան՝ Ռոբերտ Քոչարյանի խափանման միջոցն անձնական երաշխավորությամբ փոխելու համար և մարտի 16-ին իրենց ևս չեն տեղեկացրել, որ դատավոր Աննա Դանիբեկյանն անաշխատունակ վիճակում է, իսկ մարտի 17-ին դատական նիստից առաջ տեղեկացնում են, որ դատավորն առողջական խնդիրների պատճառով չի կարող գալ դատական նիստին: Ալումյանը նշեց, որ այդ իրավիճակը տևում է մինչև այսօր:

Անդրադառնալով՝ կորոնավիրուսի համավարակի տարածմանը, Ալումյանը նկատեց, որ խոցելի խմբում են 60 տարեկանից բարձր ու առողջական այլ խնդիրներ ունեցող անձինք և մարտի 24-ին միջնորդություն են ներկայացրել՝ խափանման միջոցը վերացնելու վերաբերյալ, ինչը նույնպես քննության չի առնվել:
Ալումյանը տեղեկացրեց, որ իրենց հարցին ի պատասխան, թե երբ կարող է լուծվել Աննա Դանիբեկյանի առողջական խնդիրները, ոչինչ չեն ասում:

«Հարցը ներկայացվում է այնպես, որ դա բացառապես Աննա Դանիբեկյանի անձնական խնդիրն է և ոչ ոք չի կարող այդ անձնական խնդրի վերաբերյալ բացատրություն պահանջել: Նրա առողջական խնդիրն այնպես չէ, որ միայն իր առողջական խնդիրն է: Օրինակ՝ եթե ասեն, որ վարչապետն արդեն երեք շաբաթ է, աշխատանքի չի գալիս, հասկանալի է, որ իշխանությունները պարտավոր են լինելու իր առողջական վիճակի վերաբերյալ ինչ-որ տվյալ հայտնել ժողովրդին:

Չեմ ասում՝ այսօրվա վարչապետը, հաջորդը կամ նախորդը: Տվյալ պահին տվյալ վարչապետի առողջական վիճակի հետ կապված խնդիրը միայն իր խնդիրը չէ:

Տվյալ պահին դատավոր Աննա Դանիբեկյանի առողջական խնդիրը միայն իր խնդիրը չէ և մենք իրավունք ունենք իմանալու, թե ինչում է խնդիրը, եթե ոչ դետալացված, ապա գոնե այն ձևով, թե մոտավորապես երբ է սպասվում ապաքինումը՝ շաբաթների մասին է խոսքը, ամիսների, թե օրերի»,- ասաց Ալումյանը:

Նրա խոսքով՝ Երևանի ընդհանուր իրավասության դատարանի նախագահը հավաստացիացնում է, որ բացի Աննա Դանիբեկյանից ուրիշ ոչ ոք իրավասու չէ այս հարցը քննարկել:

«Դատարանի նախագահ է և երկար ժամանակ էլ դատավոր է աշխատել: Մեզ գրավոր պատասխանում է, որ միայն Աննա Դանիբեկյանն է իրավասու այդ հարցը լուծել: Դատարանի նախագահը տարօրինակ ձևով անտեղյակ է ԲԴԽ 2018թ հուլիսի 9-ի որոշումից, որտեղ ասված է, որ դատական գործի շրջանակներում ներկայացված միջնորդությունները հանձնվում են տվյալ գործը քննող կամ քննած դատավորին, բացառությամբ այն դեպքերին, երբ տվյալ դատավորը գտնվում է արձակուրդում կամ օրենքով սահմանված այլ հիմքով բացակայում է, իսկ միջնորդությունների քննարկման համար սահմանված են սեղմ դատավարական ժամկետներ: Տվյալ դեպքում միջնորդության քննարկման համար նախատեսված է սեղմ ժամկետ»,- ասաց Ալումյանը:

Նրա խոսքով՝ ըստ ԲԴԽ որոշման, երբ դատավորը չի կարող ներկայանալ աշխատանքի, հիշյալ միջնորդությունները ծրագրի միջոցով պատահական ընտրությամբ հնարավորինս հավասարաչափ բաշխվում են տվյալ դատարանի համապատասխան մասնագիտացում ունեցող դատավորների միջև:

Ալումյանը նշեց, որ կա՛մ Երևանի դատարանի նախագահն անտեղյակ է, որ կա ԲԴԽ նման որոշում, կամ, իմանալով հանդերձ, միտումնավոր պայմաններ է ստեղծում, որ միջնորդության քննությունը ձգձգվի: Ալումյանի խոսքով՝ երկու վարկածների միջև առանձնապես տարբերություն չի տեսնում և մի դեպքում գործ ունենք անտեղյակ դատարանի նախագահի հետ, մյուս դեպքում՝ ուղղակի օրենքը խախտող դատարանի նախագահի հետ:

Աղբյուր` Փաստինֆո