Փաստ ինֆո

Փետրվարին EASA-ի կողմից իրականացված աուդիտը վերաբերում է կոնկրետ Քաղաքացիական ավիացիային, ավիաընկերությունները կապ չունեն: «Փաստինֆո»-ի հետ զրույցում այս մասին ասաց ավիացիոն փորձագետ Նավիկ Խաչատրյանը:

Նա նշեց, որ ավիաընկերությունների աուդիտը նույնպես իրականացնում է EASA-ն, բայց այժմ դա բացարձակապես կապ չունի, քանի որ խոսքը գնում է վարչության աուդիտի մասին. ««Տարոն Ավիա»-ն իսկապես չափն անցել էր, բայց դա ոչ թե պետք է եվրոպական կառույցների աուդիտի պատճառով հայտնաբերվեին, այլ հենց ՔԱԿ նախագահին նախաձեռնությամբ, քանի որ կոմիտեի նախագահի խնդիրը թռիչքային անվտանգությանը հետևելն է»,-ասաց Նավիկ Խաչատրյանը:

EASA-ի զեկույցն ավիացիոն փորձագետին չեն փոխանցել նշելով, որ իրավունք չունեն, քանի որ կա անվտանգության խնդիր: Այնուամենայնիվ մասնագետը պնդում է անվտանգության աուդիտը շատ բարդ է, խիստ են հետևում, կան խիստ ստանդարտներ: Դիտարկմանը արդյոք հնարավոր է այդ աուդիտի արդյունքը որևէ ազդեցություն ունենա ՀՀ-ի և ԵՄ-ի միջև ընդհանուր ավիացիոն գոտու մասին համաձայնագրի կնքման վրա, Նավիկ Խաչատրյանը նկատեց այն միանշանակ ազդեցություն կունենա, սակայն դա չի նշանակում, որ Հայաստանի համար բոլոր դռները փակվում են. «Սա ընդամենը զեկույց է: Ենթադրաբար վատ զեկույց է, ենթադրաբար շատ խախտումներ են հայտնաբերվել աուդիտի ժամանակ, բայց դա չի նշանակում, որ վերջ: Կարող են խորհրդակցել փորձառու մասնագետների հետ, հայտնաբերել խնդիրները: Խնդրի լուծումը կարելի է գտնել, պարզապես պետք է հասկանալ, թե ինչ են գրել»,-ասաց Նավիկ Խաչատրյանը կանխատեսելով, որ վատ արդյունքի դեպքում պարզապես Հայաստանում ոչ մի ավիաընկերություն չի գրանցվի, իսկ վատագույն սցենարի պարագայում հնարավոր է նաև չթողնեն դրսի ավիաընկերություններին Հայաստան իջնել. «Նրանց էլ պետք է վերահսկողություն սահմանել և եթե ի զորում չեն ապահովել թռիչքային անվտանգությունը, ուրեմն հնարավոր է արգելվի: Իհարկե դա ենթադրություն է»,-նշեց փորձագետը:

Վերջինսիս կարծիքով խնդիր է նաև ազգային փոխադրողի բացակայությունը: Դրա վառ ապացույցն էլ արդեն չորս օր շարունակ Մոսկվայի օդանավակայանում սպասող հայերն են, որոնք չեն կարողանում Հայաստան վերադառնալ, սակայն ազգային փոխադրող ունենալու դեպքում, փորձագետի կարծիքով, հարցն արագ կլուծվեր. «Մեր նախաձեռնողների թիմը ցանկանում էր ազգային փոխադրող ստեղծել, սակայն նախորդ տարի փետրվարի 19-ին մեզ մերժեցին, այն էլ բանավոր կերպով: Արդեն վեց տարի է ազգային փոխադրող չունենք, և երբ հեղափոխությունը եղավ, ուրախացանք մտածելով, որ կստեղծվի նաև ազգային փոխադրող: Պետությունից գումար չէինք ուզում, ընդամենը պետական աջակցություն էր պետք: Պետությանը 20 տոկոս բաժնեմաս էինք տալու, որպեսզի վերահսկի, ուղղություն տա, որ նման դեպքերում գնա ու իր քաղաքացիներին բերի: Մեր ծրագրում առաջին կետը գրված էր օդի տուրքը հանել, բայց մերժեցին ասելով, որ չի լինի: Մեզ մերժելուց ընդամենը 6 ամիս հետո Ryanair-ի համար Տաթևիկ Ռևազյանն ԱԺ գնաց, բոլոր հարցերին պատասխանեց, որպեսզի օդի տուրքը հանեն»,-ընդգծեց Նավիկ Խաչատրյանը հավելելով, որ ազգային փոխադրող ստեղծելու նախագիծը մերժում են, սակայն ՔԱԿ նախագահ Տաթևիկ Ռևազյանն իր հարցազրույցներում միշտ հորդորում է բերել լավ նախագիծ և ինքն այն կհաստատի:

Հեղինակ՝ Հասմիկ Կոշկարյան

Աղբյուր` Փաստինֆո