Փաստ ինֆո

ՍԱՏՄ ղեկավար Գեորգի Ավետիսյանն այսօր հրավիրված ասուլիսում ներկայացրել է տեսչական մարմնի կատարած աշխատանքը վերջին մեկ ամսվա ընթացքում։ Նա հայտնել է, որ իրացման ցաներին, հանրային սննդի օբյեկտներին ու սննդամթերքի արտադրություններին բաժանվել են վարակի տարածմումը նվազացնելուն ուղղված միջոցառումների ու գործողությունների ուղեցույցներ, որոնց կատարմանը տեսչական մարմինը հետամուտ է եղել։

«Մեր տեսուչներն այս ընթացքում այցելել են Երևանի մոտ 500, իսկ մարզերի մոտ 3600 սննդամթերքի իրացման կազմակերպություններ ու արտադրություններ, մինչև հանրային սննդի օբյեկտների աշխատանքի դադարեցումը նաև հանրային սննդի օբյեկտներ»,-ասաց Ավետիսյանը։
Նա նշեց, որ որոշ մարզերում տեսչական մարմնի մասնագետները Տարածքային կառավարման և տեղական ինքնակառավարման մարմինների, որոշ դեպքերում էլ ոստիկանության աշխատակիցների հետ համատեղ իրականացնում են շրջայցեր բացօթյա առևտուրը բացառելու նպատակով։

«Տեսչական մարմնի կողմից նաև համեմատական մոնիթորինգներ են իրականացվել` 2019-2020թթ կտրվածքով մարտի 1-ից մինչև 26-ն ընկած ժամանակահատվածում Հայաստանի Հանրապետություն ներմուծման ու արտահանման սննդամթերքի վերաբերյալ։ Որոշ սննդամթերքի տեսակների ներկրումներ նվազել են, որոշներինն էլ ավելացել։ Ավելացել են նաև արտահանումները»,-ասաց Ավետիսյանը։

Տեսչական մարմինն ակտիվորեն վերահսկում է նաև առցանց վաճառք իրականացնող կազմակերպություններին։

«Տեսչական մարմնի Գեղարքունիքի և Արագածոտնի մարզային կենտրոնների մասնագետներն այցելել են «Ծովագյուղ» և «Գնթունիք» սուպերմարկետների «ֆուդկորտերն» ու պարզել, որ հանրային սննդի մատուցման գործընթացը դադարեցված չէ, մասնագետների ցուցումի համաձայն աշխատանքները տեղում կասեցվել են և այսօրվանից այդ ընկերությունները միայն առաքում են իրականացնում»,-ասաց ՍԱՏՄ ղեկավարը։

Աղբյուր` Փաստինֆո