Փաստ ինֆո

ՀՀ վարչապետ Նիկոլ Փաշինյանը հեռախոսազրույց է ունեցել ՌԴ նախագահ Վլադիմիր Պուտինի հետ, որը զուտ տեղեկատվություն լինելուց զատ բավական ուշագրավ եզրակացությունների առիթ է տալիս:

Ընդհանրապես, պետությունների ղեկավարների՝ փակ դռների հետևում կայացած հանդիպումների և հեռախոսազրույցների պատմությունը որքան էլ սուղ տեղեկատվական աղբյուր լինի, այնուհանդերձ, շատ կարևոր արձանագրումներ է պարունակում դրանք փոխանցողների տողատակերում:

Բանն այն է, որ նույն հեռախոսազրույցի վերաբերյալ Հայաստանի և Ռուսաստանի Դաշնության պաշտոնական տեղեկատվությունները միմյանցից էապես տարբերվում են և այս մտայնությունը կարծես օրինաչափ է դարձել ներկայիս իշխանության համար:

Տեսեք, եթե Վլ. Պուտինը խնդրո առարկա հեռախոսազրույցի հիմնական թեմա որպես առաջնահերթության կարգով կարևորում և շեշտում է կորոնավիրուսի համաճարակի դեմ պայքարում կողմերի իրականացրած գործողությունները, ընդգծելով այդ համատեքստում Նիկոլ Փաշինյանի արտահայտած երախտագիտությունը՝ պայմանավորված՝ ռուսական կողմի ցուցաբերած օգնությամբ, ապա ՀՀ վարչապետի պաշտոնական կայքում զետեղված տեղեկատվությունը բոլորովին այլ տոնայնությամբ և առաջնահերթություններով է մեզ ներկայացնում նույն հեռախոսազրույցը։ Պաշտոնական Երեւանը նշում է, որ հեռախոսազրույցի ժամանակ քննարկվել է Հայաստանին բնական գազի մատակարարման հետ կապված հարցերը, ապա՝ ուղղակի անդրադառնում Covid-19 համաճարակի դեմ պայքարի ուղղությամբ տարվող քայլերի շուրջ կողմերի փոխանակած տեղեկատվությանը՝ այն համատեքստում, որ 2 երկրներում էլ իրավիճակը վերահսկելի է:

Եվ ընդամենը ի հավելումն որպես մենք տեղեկանում ենք, որ Փաշինյանը շնորհակալություն է հայտնել ռուսական կողմին՝ Հայաստան-Ռուսաստան բեռնափոխադրումների անխափան իրականացման համար:

Հետաքրքիր է, որ ռուսական պաշտոնական տեղեկատվությունը գազի հարցի արծարծման վերաբերյալ որևէ խոսք չի ասում, ընդհանուր առմամբ այնպիսի տպավորություն թողնելով, թե կողմերը միմյանց հակասող մեսիջներ են փոխանցում, ինչը պաշտոնական խոսակցությունների դեպքում՝ լավ բանի մասին չի վկայում, քանի որ բազում հարցականների առիթ է տալիս:

Ի մասնավորի՝ անդրադարձե՞լ են այս թեմային կողմերը, ի՞նչ մոտիվացիայով՝ դժվար է կանխատեսումներ անել, բայց Կրեմլի տարածած հաղորդագրության մեջ դրա անտեսումն արդեն իսկ վկայում է ռուսական կողմը վերաբերմունքը՝ կարծես նման քննարկում չի էլ եղել։

Նախկինում պաշտոնական հաղորդագրությունների մակարդակով դիրքորոշումների տարբերությունն ի ցույց չէր դրվում, մինչդեռ այսօր անգամ պաշտոնական տեղեկատվության տողատակերում զգալի է երկու երկրների միջև առկա լարվածությունը:

Իհարկե, կարելի է հասկանալ Նիկոլ Փաշինյանին, որը գազի գնի թանկացման հետ կապված հայաստանյան լարված իրավիճակը աչքի առաջ ունենալով՝ նախևառաջ փորձում է այն մեղմացնող տեղեկատվությունն է փոխանցում Հայաստանի քաղաքացիներին, քանի որ մարդիկ գազի թանկացման հարցի վերաբերյալ դրական լուրի են սպասում, որն, ըստ էության, լուր լինելուց զատ կվկայեր Փաշինյան-Պուտին բարեկամական հարաբերությունների, այլ ոչ թե՝ առկա լարվածության մասին:

Աղբյուր` Փաստինֆո