Փաստ ինֆո

Արցախում հեղափոխություն չի եղել, բայց նաև հակահեղափոխություն չի եղել և սա շատ կարևոր արձանագրում է։ Այս մասին այսօր ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը՝ անդրադառնալով ԱՀ-ում տեղի ունեցած ընտրություններին։

Նա նշեց, որ Արցախում ընտրությունների արդյունքում պայմանական ասած «հակահեղափոխական ուժերը» ջախջախիչ պարտություն են կրել։

«Ես ասել էի, որ եթե ոմանք փորձեն Արցախը դարձնել հակահեղափոխության օջախ, մենք Արցախը կդարձնենք հեղափոխության օջախ, այսօրվա պրոցեսն այս համատեքստում այն է, որ Արցախում հեղափոխություն տեղի չի ունեցել, հակահեղափոխություն տեղի չի ունեցել, տեղի են ունեցել ընտրություններ, և իմ դիրքորոշումն այն է, որ այս ընտրությունների արդյունքում մենք պետք է երաշխավորենք ու ապահովենք նորընտիր իշխանությունների հետ աշխատանքը»,-ասաց Փաշինյանը։

Նա հայտնեց, որ ընտրախախտումների, ընտրակաշառքների վերաբերյալ մի քանի ահազանգեր է ստացել, հանձնարարել է, որ դրանք ստուգեն, սակայն հայտնել են, որ այդ դեպքերը չեն հաստատվել։

«Ես գուցե ինչ-որ բան այնպես չգիտեմ և եթե լինեն շատ կոնկրետ տեղեկություններ, ապա դա համապատասխան արձագանքի կարժանանա, բայց ընտրությունների հետ կապված իմ գնահատականը ես տվել եմ ու շնորհավորել Արցախի ժողովրդին։ Ես չեմ ասել, որ դրանք իդեալական ընտրություններ էին, բայց արդյունքները որոշակի հետևություններ անելու հնարավորություն տալիս են»,-ասաց վարչապետը։

Աղբյուր` Փաստինֆո