Փաստ ինֆո

ՄԱԿ-ի սննդամթերքի համաշխարհային կազմակերպության զեկույցների համաձայն , 2019թ-ի հոկտեմբերին անցած տարվա հոկտեմբերի համեմատ սննդամթերքի համաշխարհային գներն աճել են 6 տոկոսով, մինչդեռ Հայաստանը 2019 թվականի դեկտեմբերին նախորդ տարվա համեմատությամբ սննդամթերքի ապրանքախմբում արձանագրել էր 0,3 տոկոս գնանկում։ Այս մասին այսօր ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը։

Նա նշեց, որ Հայաստանում նախաճգնաժամային շրջանում ցածր գնաճային ֆոն է եղել, և Հայաստանը փետրվարին 0,2 տոկոսով գնանկում է ունեցել։

Գների թանկացման մասին վարչապետին հարցն ուղղած քաղաքացին արձանագրել էր, բազմաթիվ սննդատեսակներ թանկացել են, Վանաձորում գներն ուղղակի սարսափելի են եւ որ այսպես շարունակվելու դեպքում ժողովուրդը սոված է մնալու։ Պատասխանելով քաղաքացուն Փաշինյանը միաժամանակ նշեց, որ արդեն հանձնարարել է ուսումնասիրել, թե Վանաձորում ինչ թանկացումների մասին է խոսքը։

«Օրինակ` այսօր առավոտյան վերցրել եմ խոշոր առևտրային ցանցերի իրավիճակն ու տեսել, որ այնտեղ հացի թանկացում չի եղել, որոշ ապրանքների թանկացումներ, այո, տեղի են ունեցել, և դրանք մեզ անհանգստացնում են, սակայն դրանց մի մասը կարող է կապված լինել արտարժույթի տատանումների հետ»,-ասաց Փաշինյանը։

Նրա խոսքով, այս ռիսկը կառավարելու համար Կառավարությունը հակաճգնաժամային միջոցառումներ է ձեռնարկում և ներդրողներին տալիս արտոնյալ վարկեր։

«Այս գործիքի միջոցով պետք է օգնենք, որպեսզի անվերահսկելի աճ տեղի չունենա։ Գիտեք, որ ավելի քան 600 ապրանքների մաքսատուրքերը բարձրացել են 2020 թ. հունվարի 1-ից և մենք հիմա բանակցեցինք, որ առաջիկա 6 ամիսների համար այդ մաքսատուրքերն իջնեն»,-նշեց վարչապետն ու ավելացրեց, որ այս գործողությունները որոշակիորեն կմեղմեն գնաճը։

«Ես խնդրում եմ, եկեք ինքներս մեզ չվախեցնենք, որ սով կլինի,Հայաստանը բերի, բերքառատ երկիր է, մեր ժողովուրդն աշխատող ժողովուրդ է և մենք միասին բոլոր դժվարությունները կհաղթահարենք։ Հայաստանը բավարար պաշարներ ունի»,-ավարտելով խոսքն ընդգծեց Փաշինյանը

Աղբյուր` Փաստինֆո