Փաստ ինֆո

Հնարավոր են պարենային որոշ ապրանքների թանկացումներ: Լրագրողների հետ հանդիպման ժամանակ այս մասին ասաց ՀՀ էկոնոմիկայի նախարար Տիգրան Խաչատրյանը անդրադառնալով հնդկաձավարի և ոսպի թանկացումներին:

«Մեր ապրանքային հոսքի զգալի մասն իրանական կողմից կամ Լարսի կողմից հանդիպում էին որոշակի դժվարությւոնների: Չնայած այդ դժվարություններին, ի պատիվ մեր տնտեսվարողների պետք է ասենք, որ առ այսօր հնարավոր է եղել ապահովել կանոնավոր մատակարարումներ»,-ասաց Տիգրան Խաչատրյանը:
Անդրադառնալով հնդկաձավարի թանկացումներին նախարարն ասաց, որերբ նախորդ շաբաթ մասնավոր հատվածի կազմակերպությունների հետ քննարկում էին, պարզաբանում եղավ, որ հնդկաձավարի գները Ռուսաստանում սկսել էին բարձրանալ մասնավորապես մինչև կորոնավիրուսի ազդեցությունը, ինչը պայմանավորված է շուկայով. «Օրինակներ էին բերվում, որ նախորդ հունվարի նկատմամբ այս հունվարին արդեն երկու անգամ գների բարձրացում է տեղի ունեցել: Այստեղ երկու գործոնի ազդեցություն կա: Հնարավոր են, որոշ ապրանքների գների փոփոխություններ, որոնք տեսանելի են, բայց հույս ունենք և տեսնում ենք այդ ուղղությամբ տարվող ջանքեր, որ մեր տնտեսվարողներն այնպես են կազմակերպում իրենց աշխատանքը, որ դա սպառողների համար հարմարավետ լինի և գների բարձրացման չբերի»,-ասաց նախարարը:

Վերջինս ընդգծեց, որ եթե որևէ դեպքում ՏՄՊՊՀ-ն նկատի, որ առանձին տնտեսվարողներ, օգտվելով իրավիճակից, չարաշահում են իրենց դիրքերը, ունի բավարար գործիքներ այդ երևույթները կանխելու համար։

Աղբյուր` Փաստինֆո