Փաստ ինֆո

Մահակով և հակագազով ցուցմունք կորզելու գործով տուժող կողմը համոզված է՝ արարքը սխալ է որակվել. Ոստիկանների կողմից կիրառված բռնությունն իր մեջ խոշտանգում է պարունակում։ Այս մասին «Փաստինֆո»-ի հետ զրույցում ասաց գործով տուժողի ներկայացուցիչ, փաստաբան Արա Ղարագյոզյանը՝ նշելով, որ միջնորդություն է ներկայացրել՝ դատահոգեբանական փորձաքննություն նշանակելու մասին:

«Առերեսում է եղել երկու մեղադրյալների հետ, իմ պաշտպանյալն առերես պնդել է իր ցուցմունքը և նշել հանգամանքները, որի շրջանակներում իրենից հակագազով ցուցմունք են կորզել: Միջնորդություն եմ ներկայացրել ՀՔԾ՝ դատահոգեբանական փորձաքննություն նշանակելու մասին, քանի որ իմ պաշտպանյալի մոտ ոչ միայն ֆիզիկական վնասներ են եղել, այլև՝ հոգեբանական ցավ է առաջացել: Վարույթն իրականացնող մարմնից գրություն եմ ստացել, որ պետք է այդ հարցի շուրջ հարցաքննեն, ապա՝ որոշում կայացնել փորձաքննություն նշանակելու կամ չնշանակելու մասին»,- ասաց Ղարագյոզյանը:

Նրա խոսքով՝ հարցաքննությունը հետաձգվել է՝ կորոնավիրուսի համաճարակի հետ կապված:

Դիտարկմանը, որ դեպքը տեղի է ունեցել 12 տարի առաջ և արդյոք տարիներ անց դատահոգեբանական փորձաքննությունը կարո՞ղ է արդյունավետ լինել, Ղարագյոզյանը պատասխանեց. «Խոշտանգումների զոհերի դեպքում ուզում է 20 տարի անցնի: Եթե անձը խոշտանգվել է, իր հոգեբանական ցավը չի տուժում: Մարմնական վնասվածքների դեպքում 10 օր անց է վնասվածքն անցնում, սակայն հոգեբանական ցավի դեպքում հնարավոր է պարզել անձը խոշտանգման ենթարկվել է, թե ոչ՝ հոգեբանի, հոգեբույժի և բժիշկի ներգրավմամբ»:

Հարցին, թե արդյո՞ք խոշտանգման գործերով վաղեմության ժամկետ գոյություն չունի, Ղարագյոզյանը պատասխանեց, որ ներպետական օրենսդրությամբ չկա կարգավորում, սակայն ՄԻԵԴ ԵԽ նախարարների կոմիտեն պնդում է, որ այն պետությունները, որոնք միացել են Կոնվենցիային, պետք է վաղեմության ժամկետ չկիրառեն խոշտանգումների դեպքերով:

«Ինչպես գիտեք՝ մենք 2015թ.-ից հետո ունենք խոշտանգման հոդված և այդ իսկ պատճառով խոշտանգման մեղադրանք չի առաջադրվել, քանի որ այդ ժամանակ չի եղել այդ հոդվածը: առաջադրված է եղել ՀՀ քրեական օրենսգրքի 309-րդ հոդվածի 2-րդ մասով»,- ասաց փաստաբանը:

Անդրադառնալով՝ այն հանգամանքին, որ մեղադրանք է առաջադրվել երկու անձի, սակայն տեսանյութում երևացող անձանց թիվը մեծ է, Ղարագյոզյանն ասաց, որ չգիտի, թե ինչ փաստական տվյալներ է ձեռք բերել վարույթն իրականացնող մարմինը, որ այդ երկու անձին է մեղադրանք առաջադրել, սակայն մինչև վերջ պնդելու են, որ բոլոր անձինք ենթարկվեն պատասխանատվության:

Հարցին, թե արդյո՞ք դատահոգեբանական փորձաքննությամբ խոշտանգման փաստի հաստատման դեպքում առաջադրված մեղադրանքը կխստացվի՝ Ղարագյոզյանը պատասխանեց, որ այդ պատճառով է ներկայացրել միջնորդությունը և խոշտանգման փաստի ապացուցման դեպքում ՀՀ քրեական օրենսգրքի 309-րդ հոդվածի 2-րդ մասը կվերաորակվի 3-րդ մասով, որի դեպքում պատիժն ավելի ծանր է: Դիտարկմանը, որ նախաքննությունը գտնվում է ավարտական փուլում և այս փուլում դատահոգեբանական փորձաքննությունը կարող է երկարացնել գործի նախաքննությունը՝ Ղարագյոզյանը նշեց, որ իրենց համար ինքնանպատակ չէ, որ գործն արագ ուղարկվի դատարան և, եթե վարույթն իրականացնող մարմինն այս փուլում նախաքննության ավարտի մասին հայտարարությամբ հանդես գա, ապա՝ տուժող կողմը կառարկի:

Հիշեցնենք, որ 2019թ. նոյեմբեր ամսին համացանցում 12 տարվա վաղեմության տեսանյութ հրապարակվեց, որտեղ երևում է, թե ինչպես են ոստիկանները հակագազերով և մահակներով ցուցմունք կորզում բերման ենթարկված քաղաքացուց: Տեսանյութի հիման վրա ՀՔԾ-ում հարուցվել է քրեական գործ ՀՀ քրեական օրենսգրքի 309-րդ հոդվածի 2-րդ մասով՝ պաշտոնեական լիազորություններն անցնելու համար, որը զուգորդվել է բռնությամբ: Նշանակված ծառայողական քննության արդյունքում տեղեկություններ են ձեռք բերվել տեսանյութում երևացող երեք անձի վերաբերյալ: ՀՔԾ-ում հարուցված քրեական գործի շրջանակներում մեղադրանք է առաջադրվել Ճամբարակի պետ Ն. Ս.-ին, ապա՝ Արաբկիրի հետախուզության բաժանմունքի նախկին պետ Վ.Ս.-ին:

Փաստաբան Արա Ղարագյոզյանի փոխանցմամբ՝ 12 տարի առաջ տղամարդը բերման էր ենթարկվել գողություն կատարելու կասկածանքով և, քանի որ ցուցմունք կորզել հաջողվել էր, վերջինս դատապարտվել էր ազատազրկման, ապա՝ համաներմամբ ազատ արձակվել, իսկ այժմ գտնվում է անազատության մեջ մեկ այլ գործով։

Հեղինակ՝ Իզաբել Սահակյան

Աղբյուր` Փաստինֆո