Փաստ ինֆո

Արտակարգ դրության պայմաններում կա վտանգ նաև ընտանեկան բռնության աճի: Այս ընթացքում ահազանգեր եղել են: «Փաստինֆո»-ին այս մասին ասաց «Ընդդեմ կանանց նկատմամբ բռնության կոալիցիայի» հանրային կապերի պատասխանատու, իրավապաշտպան Զարուհի Հովհաննիսյանը:

Վերջինս, սակայն, նկատեց, որ վերահսկողությունն այժմ ավելի է մեծացել, հետևաբար չի կարող ասել այն ծավալով, որը կարող էր լինել ահազանգեր եղել են. «Մեր շահառուների մեծ մասի հեռախոսահամարներն իրենց ամուսինների անունով է, հետևաբար նրանք շատ հեշտ վերահսկում են կանանց: Բացի այդ՝ բոլորը տանն են այժմ: Այսինքն՝ գործնականում կանայք փորձել են զանգահարել և աջակցություն խնդրել, երբ բռնություն կիրառած ամուսինը դուրս է եկել տանից, իսկ այժմ դա հնարավոր չէ»,-ասաց Զարուհի Հովհաննիսյանը:

Այնուամենայնիվ այս ընթացքում ահազանգեր եղել են, ընդ որում ոչ միայն ընտանեկան բռնության ենթարկվածների կողմից, այլև սոցիալական աջակցության խնդրանքով. «Մեր նախկին շահառուների կողմից սոցիալական աջակցության խնդրանքներ են եղել: Ընտանեկան բռնություն վերապրած կանայք, որոնք փորձում են ինքնուրույն լուծել իրենց սոցիալական հարցերը, ծայրահեղ ծանր պայմաններում են հայտնվել, քանի որ նրանք հիմնականում օրավարձով և չգրանցված աշխատողներ են: Այս ընթացքում փորձում ենք լուծել նաև այդ կանանց սոցիալական խնդիրները»,-ասաց իրավապաշտպանը:

Վերջինս ընդգծեց, որ ընտանեկան բռնության թվի աճի վտանգ կա, ինչի համար պետք է աջակցության ավելի լուրջ մեխանիզմներ մտածել և կիրառել. «Մենք չենք կարող ամեն բնակարան մուտք գործել: Դա հիմնականում ոստիկանության գործառույթն է, եթե կա որևէ կասկած: Բայց հասարակությունը նույնպես պետք է իրազեկված լինի: Քանի որ բոլորը տանն են և ավելի ականջալուր են շրջապատի ձայներին, պետք է ավելի զգայուն և զգոն լինեն և նման դեպքերում անմիջապես ահազանգեն»,-նշել է Զարուհի Հովհաննիսյանը:

Հարցին արդյոք կան թվային տվյալներ, թե հատկապես այս օրերին որքան մարդ է ահազանգել այդ հարցով, իրավապաշտպանը նկատեց նախորդ տարվա մարտ ամսվա համեմատ առնվազն 30-50 զանգի ավելացում կա. «Բայց այդտեղ կան նաև սոցիալական աջակցության խնդրանքով զանգեր, միայն ընտանեկան բռնության հետ կապված զանգերը չեն: Բայց նաև չենք համարում, որ դա ամբողջ ծավալը կլինի: Հետագայում արդեն այս ընթացքից հետո մեկ այլ մեխանիզմ կգործադրենք: Երբ զանգեր լինեն, կհարցնենք արդյոք ցանկացել են այս ժամանակահատվածում զանգել, թե ոչ»,-հավելեց իրավապաշտպանը:

Աղբյուր` Փաստինֆո